Welatijanê Îdirî bi cil û belganê xo yê renginan beşdarê pîrozkerdişê Newroze bîyî û bi coşêko gird roşanê xo pîroz kerd. Pîrozkerdişî de piştîdayîşê vengdayîşê Abdullah Ocalanî vejîya vernî û dewlete rê vengê “game bierze” ame kerdiş.
Îdîr de bi sloganê “Raybero Azad Komelo Demokratîk” Newroze ameye pîrozkerdiş. Pîrozkerdiş Meydanê Şeker Pancarî de ame kerdene. Şar saetanê rew ê serê sibayî ra meydanî de amade bî.
Bi hezaran kesî beşdarê pîrozkerdişî bîyî. Cil û belgê bi renganê kesk, sûr û zerdî yê welatijan bale ant. Tayê ciwanî zî rîyê xo bi renganê kesk, sûr û zerdî boyax kerdbî. Meydanî de xeylê reyî sloganê “Bijî Serok Apo” û “Jin jîyan azadî” ameyê berzkerdene.
Pîrozkerdişî de verê cû seba ê kesan ke têkoşînê azadî û demokrasî de canê xo vindî kerdo, rêz ameye girewtene û dima zî program dest pêkerd.
‘Gelo şima hema zî paweyê çiyê?’
Parlementerê DEM Partî yê Îdirî Yilmaz Hunî pîrozkerdişî de wina va: “Newroze, xoverdayîş a, vejîn a û serewedaritişê cinî û ciwanan a. Serewedaritişê vera zilm û zordarî ya. Ewro her Kurdîstanî de adirê Newroze ameyo wekerdene. No adir heta ke ma azad bibê do tim biveşo. Rêzdar Ocalanî 27ê sibate de seba şaranê dinya venga înan da. Ganî heme şarî berpîrsîyarîya xo ya vera nê vengdayîşê bîyarê ca.”
Endama Meclîsa DBP’yî Muazzez Orhanî zî ewil Mazlûm Dogan, Sema Yuce, Bêrîvan û Rahşan ard vîrê xo. Muazzez Orhanî wina qisey kerd: “Newroze xoverdayîşê kesanê ke ganê xo kerd xeleka adirî, yê înan a. Newroze, cinî ya. Çunke ewil cinî ameya bindest kerdene. Eke cinî azad biba komel zî do azad bibo. Rahşanan bi canê xo têkoşînê azadîya cinîyan roşnî kerd. Aye ra cinî pêşengê têkoşînê azadîye û viraştişê aştî û komelê demokratîkî yê. No îrade ewro zî meydananê Newroze de yo. Verê cû şarê Kurd rêzdar Ocalanî seba şaranê Rojhelatê Mîyanênî rayîrê çareserîye nîşan da. Ma zî amade yê ke wayîrê nê vengdayîşî vejîyê. Ma venga dewlete danê; seba ke cewabê nê vengdayîşê bidê şima paweyê çi yê? Gelo ganî hema çend kesî bimirê? Ma êdî nêwazenê ke kes bimiro.”
‘Ma rêzdar Ocalanî reyde yê’
Parlementerê DEM Partî yê Agirî Sirri Sakikî zî wina va: “Şert û merc çi benê wa bibê, no adir no 50 serrî yo tim geş bî. ‘Kart û kurtan’ ra şarêko pîl ame viraştene. Şarê Kurdî ewro şarê tewr muhîm yê Rojhelatê Mîyanênî yo. Bedelê nê şarê ma koyan û zîndanan de zaf pîl da. Rêzdar Ocalanî 27ê sibate de manîfestoyêko newe îlan kerd. Va ke do rêxistina ke 50 serrî yo dewam kena, wa çekan rona. Rayîrêko newe akerd. Rêzdar Ocalanî Îmrali ra rayîrêko newe pêşnîyaz kerd. Pêşnîyazê ey o yo ke komelêko demokratîk û yewîya şaranê Kurd û Tirkan bêro viraştene. Ma zî nê meydanan de vanê ke ma bi proseso ke rêzdar Ocalanî Îmrali de da destpêkerdene, ey reyde yê. Nê meydanî ra hezar silamî to rê. Na seserre do biba seserra Kurdan.”
Badê qiseykerdişan şarî bi hewayêko yewveng sloganî “Bijî Serok Apo” vat. Badê wekerdişê adirê Newroze deyîrbaz Hîvron sehne girewt. Bi hezaran kesî deyîranê Hîvronî reyde govende girewte. Dima repvaj Pîroz vejîya sehneyê ser o û deyîrê xo vatî.
Pîrozkerdişê Newroze govendgirewtişî reyde qedîya.
