Serrgêra Qirkerdişê Helebçe de Şûbeyê Çewlîgî yê ÎHD’yî meydanê şaristanî de eşkerayî daye.
Serrgêra Qirkerdişê Helebçe de Şûbeyê Çewlîgî yê ÎHD’yî eşkerayîye daye. Temsîlkarê ÎHDyî yê Çewlîgî Cemalettîn Gizelî meydanê şaristanî de eşkerayî wende.
Eşkerayîye de ame vatene ke ewro 16ê adare roja vîrardişê jenosîdî yo ke rejîmê Seddam Huseyînî çarçeweya Operasyonê Enfalî de sere de Helebce bajaranê kurdan de kerd.
ÎHD’yî vat ke serranê ke Seddam Huseyîn îqtîdar de bî, rejîmê hetê Baasê nîjadperest û kolonîyalîstî ra vera kurdan sîyasetê asîmîlasyon û çinkerdişî ame caardene. Encamê nê sîyasetan de 16ê adare 1987î ra heta peynîya 7ê hezîrane 1989î Iraq de vera kurdan Operasyonê Enfalî ame ramitene. Nê operasyonan de çekê kîmyewî, îdamê kolektîfî, bombardûmankerdişê hewayî û koçberkerdişê bêrehmî ameyê şuxulnayene û encam de 4.500 dewî ameyê veşnayene û 1 milyon ra vêşêr kesî bîyê penaber.
16ê adare 1988î de vernîya çimanê dinya de jenosîdanê tewr bêrehman ê tarîxî ra yew ame kerdene. Helebce de gazê jehrinî şuxulnîyî û 5 hêzar ra vêşêr kurdî ameyê kiştene, 10 hêzar ra vêşêr kesî zî birîndar bî. Heta ewro texmîn beno ke sebebê hêrişanê çekê kîmyewîyan ra 43 hêzar û 753 kesî merdî û 61 hêzar ra vêşêr kesî zî seqet mendî.
ÎHD’yî qerar girewt Tirkîya de 16ê adare sey “Roja Jenosîdê Kurdan” nas bikero û waştişê ci est o ke Komara Tirkîya zî nê jenosîdî nas bikero.
ÎHD’yî vat: “Sûcê jenosîdî sûcêk o ke vera merdimîye ameyo kerdene. Coka nê kerdişî ganî sey jenosîd bêrê namekerdene. Operasyonê Enfalî de, jenosîdî de êyê ke cuya xo ra bîyî, reyna anê xo vîrî û vanê: Reyna tu wext!”
