Înîsîyatîfê Cinîyan ê Mi rê Aştî Lazim a Gulcan Tarkan dîyar kerd ke ganî komîsyonê Meclîsî de mabênê cinî û camêrdan de têduştî bibîyêne û panc pêşnîyazî komîsyonî rê kerdî.
Çarçewaya Prosesê Aştî û Komelê Demokratîkî de ke bi vengdayîşê Rayberê Şarê Kurdî Abdullah Ocalanî amebi destpêkerdene, Meclîs de komîsyono ke parlamenteran ra yeno pê, amebi awankerdene. Kombîyayîşo ewilin zî do ewro bêro kerdene û her kes meraq keno ke do çi xebatan bikero û çi qeraran bido.
51 endaman ra 9ê ci cinî yî
Heme derûdorê komelî komîsyonî ra çîyan pawenê û nêtêduştîya mabênê cinî û camêrdan de rayîrê reaksîyonan akerd. 51 endamanê komîsyonî ra 21ê ci yê AKP, 10ê ci yê CHP, 4ê ci yê DEM Partî, 4ê ci yê MHP û 3ê ci yê Partîya Yenî Yolî yê. MHP, Partîya Yenî Yolî, TÎP, EMEP û DSP’yî tu endamê cinî beşdarê komîsyonî nêkerdê. Nê daneyî zî vernîya reaksîyonanê rêxistinanê cinîyan akerd.
‘Lazim o partîyanê sîyasîyan reyde bisînor nêmano’
Înîsîyatîfê Cinîyan ê Mi rê Aştî Lazim a Gulcan Tarkan dîyar kerd ke ganî komîsyon partîyanê sîyasîyan reyde bisînor nêmano û vat: “Ganî binpaykerdişî ke tesîrêko pîl vîrê komelî ser o kerdî, bi eşkerayî bêrê qiseykerdene û heme muxatabî beşdarê prosesî bêrê kerdene. Meseleyê kurdî merkezê têkoşînê demokrasî, têduştî û azadîye yê Tirkîya de yo. Seba çareserîyêka demokratîke zî lazim o heme derûdorî bi hewayêko çalak beşdarê prosesî bêrê kerdene.”
Kilîtê bedilnayîşî: Cinî
Dewamê qiseykerdişê xo de Gulcan Tarkan dîyar kerd ke cinî kilîtê bedilnayîşê komelî yê û nê çîyî vatî: “Rijnayîşê sîyasetê camêrdê serdestî û temsîlkarîya çalak a mekanîzmayanê qerardarîyan de, do aştî rê xizmet bikero. Aştî tena bêvengbîyayîşê çekan nîya. Eynê wextî de bedilnayîşê cuya komelkî ya bingeyê edaletî ser o, têduştî û azadîye ya. Kerdoxê nê prosesî cinî yê.”
Seba komîsyonî 5 pêşnîyazî
Gulcan Tarkanî seba komîsyonî nê pêşnîyazî rêz kerdî:
-Ganî rêxistinê komelê sîvîl, rêxistinê heqanê merdiman û heme derûdorê komelî beşdarê prosesî bêrê kerdene.
-Ganî binpaykerdişê heqan û polîtîkayê xemsarî bi eşkerayî bêrê erjnayene û raya pêroyî reyde bêrê parekerdene.
-Ganî ziwanê heme şaranî ke nê erdî ser o ciwîyenê, bi hewayêko fermî bêrê naskerdene û zemînê perwerdeyê bi ziwanê dayîke, waştişê xoserîya kulturî û ûsn. bêrê awankerdene.
-Ganî qanûn û yasayê Meclîsî newe ra bêrê erjnayene û vernîya azadîya xoîfadekerdişî û xebatanê yasayî bêra akerdene.
-Ganî girewteyê hepisxaneyan û binpaykerdişê heqan bi lez bêrê erjnayene.
