Mergê maya Rayberê Şarê Kurdî Abdullah Ocalanî Ûveyş Ocalane ser o 32 serrî vîyartî. Rayberê Şarê Kurdî Abdullah Ocalanî seba aye vatêne “Tam yew tufana serewedaritişî bîye.”
Mergê Ûveyş Ocalane ser o 32 serrî vîyartê ke têkoşînê cinîyan de Rayberê Şarê Kurdî Abdullah Ocalanî rê bîya îlham. Uveyş Ocalane 11ê nîsana 1993î de riyê nêweşîya şekeri ra şîye heqîya xo. Rayberê Şarê Kurdî Abdullah Ocalan wexto ke behsê aye keno wina vano: “Tam yew tufana serewedaritişî bîye. Aye qet kesî verî de sereyê xo nêronabi.”
Uveyş Ocalane 26ê teşrîna peyêne serra 1918î de taxa Erahî (Ortayol) ya Xelfetî de ameye dinya. 75 serrî cuya Uveyş Ocalane serewedaritiş û xoverdayîşî reyde vîyarte.
‘Maya mi tam yew tufana serewedaritişî bîye’
Rayberê Şarê Kurdî Abdullah Ocalan ke kitaban û parêznameyanê xo de behsê maya xo keno û wina vano: “Vera neheqîyan ez ‘şer’î aye ra musaya.” Û wina dewam keno: “Heqê mayîye tena bi têkoşînêko pîl do bieşkîyo bêro dayene. Dayîşê heqê yew maye zî no tewir beno. Yew cinî rê eleqe senî şêno bêro dayîş? Analîzê azadîya cinî de rasto ke ma mojnayo, merdim eşkeno eyn tarzî de cewab bido mayan zî. Hewce nêkeno ke hedîyeyê qijkekî bêrê girewtene; goreyê mi analîzê azadîya cinî seba mayan hurmetêko tewr gird o. Eke tesîrê maya mi nêbîyêne, ez do senîn nêzdîyê cinîyan bibîyêne? Tesîrê nê têkilîyan ke mi ser o bî, sebeb bî ke ez cinîyan reyde eleqedar biba.”
‘Tesîrê maya mi bî sebeb ke ez cinîyan reyde eleqedar biba’
Rayberê Şarê Kurdî Abdullah Ocalan her fersendî de îfade keno ke tesîrê maya xo Uveyşî têkoşîn û şexsîyetê ey ser o zaf gird bîyo û wina vano: “Tesîrê maya mi ra nêbîyêne, ez do senî nêzdîyê cinîyan bibîyêne? Tesîrê nê têkilîyan ke mi ser o bî, sebeb bî ke ez cinîyan reyde eleqedar biba. Hêzê maye, şerkerîya maye, tesîrê nê çîyan seba ke ez problemê cinîyan reyde eleqedar biba û înan înkar nêkera, mi ser o zaf bî. Qet nêbo ez nêkerda sey pîyê mi yan zî camêrdê ke cîranê ma yê. Bi mi tîya de para maya mi est a. Ez zana ke maya mi zaf têkoşer bîye. Tesîrê cinîyêka winasîne ke bi asanî nêwazenê bikewa binê serdestîya camêrdan zaf şênber o.
‘Ez wesîyetê maya xo tepişena’
Erjnayîşo bîno ke Rayberê Şarê Kurdî Abdullah Ocalanî maya xo ser o kerdo, no yo:
“Ez yadkerdişê mayan zaf muhîm vînena. Mi zaf şer kerd a cinî reyde. Mi parêznameyê xo de de behsê ney zî kerdbî. Ez wesîyetê maya xo pawena. A vatêne ‘Ti karanê komelkîyan reyde mijûl bibî, ti tena manenî’. Vatêne ‘Ti zaf xebitîyenî, ti zaf fedakar î, ti do tena bimanî.’ Raşta zî na qala aye raşt vejîyaye. Mi zî aye rê nimûneyê kerge û lîçike da. Mi vatêne ‘Ez to ra weşêr înan pawena.’
‘Her tim vatêne, ‘Rojêk ma do teqez do qezenc bikerê’
Fatma Ocalane seba maya xo Uveyş vana ke a şexsîyetêka mêmandare bîye. Fatma wina dewam kerd: “Maya mi wexto ke mêman ameyêne zaf keyf kerdêne. Ma ke hêga ra agêraynê, maya mi ma rê pilaw û do viraştêne. Ma nê werdî ra zaf hes kerdêne. Dewijan maya mi ra zaf hes kerdêne. Aye her tim bawer kerdêne ke şarê kurdî do rojêk qezenc bikerê. A her tim vatêne, ‘Rojêk ma do teqez qezenc bikerê.’ Maya mi Uveyş cinîyêka winasîn bîye ke merdim pê aye sereberz bîyêne.”
Uveyş Ocalane lajê xo Abdullahî tewr peyên 17ê teşrîna peyêne 1975î de tezîyeya mêrdeyê xo de vînena. Waştişê Uveyş Ocalanî yo tewr gird heta ke emrê xo da, no bî ke lajê xo Abdullahî bivîna. La bê ke a waştişê aye bêro ca, şîye heqîya xo.
‘Tewr zaf waştêne ke reyna ey bivîna’
Kênaya Uveyş Ocalane Fatma Ocalan ke behsê maya xo kena, vana ke maya aye vîrê aye de bi şexsîyetê xo yo hişk û ‘ez vaja se o beno’ ca gêna. Fatma Ocalan wina dewam kerd: “Serekî tewr peyên tezîyeya pîyê mi de dî. Tewr zaf waştêne ke reyna ey bivîna. No waştiş her tim fekê aye de bî. Bê ke ey bivîna merde. Heme emrê xo de her tim hêrsê aye est bî. Merdimêka winasîn bîye ke vatêne ‘ez vaja se o beno’. Badê darbeyî mecbur mende ke şêra Edene. Teqrîben 10 serrî uca de mende la nêeşkaye erdê xo ra dûrî vindera û agêraye. La çend serrî ra dima emrê xo da.”
