Protestoyanê Rojhelatê Kurdîstan û Îranî de 47 rojan de 219ê ci gedeyî 7 hezar û 5 kesî çalakîyan de ameyê kiştene
Ajansê Xeberan ê Aktîvîstanê Heqanê Merdiman (HRANA) bîlançoyê 47 rojan ê çalakîyanê Îran û Rojhelatê Kurdîstanî weşana.
Goreyê raporê HRANA’yî ameyo tesdîqkerdene ke çalakîyan de 7 hezar û 5 kesî ameyê kiştiş. Goreyê raporî 219ê gedeyî, 6 hezar û 506 çalakîkerî û 66 sivîlî ke tewrê protestoyan nêbîyê ameyê kiştiş, 214 kesî ke girêdayeyê hêzê rejîmî yê, cuya xo vîndî kerda.
Sewbîna zî rapor de ame dîyarkerdene ke hema zî hedîseyê mergî yê 11 hezar û 730 kesan zî prosesê cipersayîşî de yo. Rapor de ame dîyarkerdene ke 25 hezar û 845 çalakîkerî zî birîndar bîyê, 136 wendekaran reyde 53 hezar û 166 kesî ameyê girewtene, 11 hezar û 51 kesî seba îfadeyî ameyê venga înan ameyo dayene.
Rapor de ame dîyarkerdene ke hêzê rejîmî seba bêvengkerdişê çalakîkeran û têkilîyê mabênê çalakîkeran înternetî birnayo û SIM kartê înan bloke kerdê.
‘Dibistanan de zî teda vêşî bîya’
HRANA’yî bale ante raporê Konseya Koordînasyonê Sendîkayê Mamostayanê Îranî ser o û dîyar kerd ke dibistanan de teda vêşî bîya û nê çîyî ameyê vatene: “Goreyê raporê konseyî, endamê Besîcî, nameyê wezîfedaranê dînî ser o sey sîxûranê sivîl tay dibistanan de tewrê programan bîyê. Wezîfeyê nê kesan o yo ke wendekaran ser o tedaya psîkolojîk bikerê.”
Sewbîna zî sazgehî dîyar kerd ke tewr tay 200 wendekarî çalakîyan de ameyê qetilkerdene.
