Wezaretê Karanê Teberî yê Îraqî, seba vatişanê Wezîrê Karanê Teberî yê Tirkîya Hakan Fîdanî yê 9ê sibatê, venga Balyozê Anqara yê Bagdatî Anil Bora Înan da ke bêro wezaret û vat ke nê vatişan têkilîyê di dewletan xirab kerdî.
Goreyê ajansa INA, Hakan Fîdanî CNN Tirk de vatbî: “Nê karî de linga Îraqî zî est a. Badê ke linga Sûrîye biqedîya, linga Îraqî zî est a. Înşallah Îraq tîya ra derse bigîra û qerarêko aqilmend bigîrê.”
Wezaretê Karanê Teberî yê Îraqî Balyozê tirkî qebul kerd û Musteşarê Têkilîyanê Dihetan Balyoz Muhammed Huseyîn Behr el-Ulumî “xemgînîya Iraqî ya seba vatişanê ke medya de cayê xo girewtî” îfade kerd. El-Ulumî vat ke nê vatişan têkilîyanê dostaneyan ê Iraq û Tirkîya xirab kenê, mudaxeleyê karê zereyê Iraqî û binpaykerdişê teamûlê dîplomatîk ê.
Musteşarî vat ke Îraq dewleta sazgehan a ke sîstemê sîyasîyê demokratîk qanûnî est o û nêeşkeno bi dewletê ke sîstemê sîyasî yê cîya yê, pîya bêro têhetronayene. El-Ulumî vat ke dosyaya Şingalî û heme herêmanê bînan ê Iraqî pêro meseleyêka neteweyîye ya û çarçeweya vernîyîya neteweyîyan û mekanîzmayan de yena destgirewtene. Hemverê her mudaxeleyê teberî de yê ke biwazê çareserîye ferz bikero yan na dosya seba tesîrê sîyasî û leşkerî bixebitno.
Balyozê tirkî vat ke vatişê Wezîrî seba açarnayîşê xeletî rast nêameyî fehmkerdene û vatişê ci derheqê unsûranê PKK’yî yê ke Iraqî de yê û têkilîya ci bi karê zereyê Iraqî û hemwelatîyanê iraqîyan de çin a.
