Îrfan Geylanî serê şerê DYA-Îsraîlî û Îranî, muhîmîya PJAK’î ya sîyasî û komelî ser o qisey kerd û vat: “Endî ca seba nezelalî nêmendo. Wexto ke qalê azadî yeno kerdene nameyê PJAK’î bi zanayîş denklem ra yeno vetene, no tena nerazîbîyayîş nîyo la wedaritişêke bi zanayîş yeno kerdene. Wedaritişêko koke xo mentiq ra ney, ters ra gêno. PJAK hêrsêke pêserî û waştenêka tarîxî ya.”
Têkilîya Îran û Îsraîlî bi des serran a serê bingeyê hemverîya xorîne ya îdeolojîk û stratejîk a. Îsraîl, Îranî sey tehdîdêke estbîyene vîneno, taybetî semedê programê atomî yê Îranî û paştîdayena ey ya seba grûbanê çekdaran ê herême sey Hamas û Hîzbullahî. Îsraîl wazeno Rojhelato Mîyanên de bibo yewek hêzo hegemonîk. Îran zî wazeno statukoyê xo yê hêzo hegemon yê herême bipawo. 28ê sibate de heta roja ewro mabênê DYA-Îsraîl û Îranî de şerêko çetin qewimîyeno. Hêrişanê destpêkê de ame eşkera kerdene ke Rayberê Dinî yê Îranî Elî Hamaney zî mîyan de xeylê fermandarê payeberzî yê Pasdaranê Şorişî (IRGC) ameyê kiştene.
Heta nika sîstemê pawitena asmenî yê Îranî, merkezê fermandarî, depoyê fuzeyan û teyaragehê leşkerî ameyê hedefgirewtene û rijnayene. Îsraîl ewro bi hewayêko sîstematîk merkezanê sereke yê atomî û tesîsanê enerjî yo, binawanîya şaristananê girdan hedef gêno. Îran zî vera nê hêrişan kampanê leşkerî yê DYA’yî welatanê Kendawe bombarduman keno û Neqebê Hurmuzî ke seba neqilkerdişê enerjî seba dinya xetêko tewr muhîm o gêno.
Aktivîsto sîyasî Îrfan Geylanî Ajansê Welatî qisey kerd û bale antê serê şerê Rojhelatê Mîyanên, rewşa şarê kurdî û partîyanê kurdan yê Rojhelatê Kurdîstanî.
‘Amancê hêzanê hegemonan hîrakerdişê menfîetanê înan o’
Îrfan Geylanî bale ante serê netîceyê şerî û rewşa sîyasî, cuya komelkî, ekonomî û wina vat: “Çîyê ke ewro Îran û rojhelatê qewimîyeno, têmîyankewtiş û zextî pêwa girêdayeyê; zextê ekonomî ke cuya rojane zehmet kerda, bêbawerîya sîyasî ke venganî mabênê şar û hukmatî de xorîn kerda, dorûverêko bi emnîyet ke taybetî nêzdîyê sînorî, mîyan de herêma kurdî zî zaf zêde yeno hîskerdene. Na tena meseleya sîyasetî nîya; meseleya rastîya cuya merdiman a. Keyeyê ke her roje bi fikar aya benê, ciwanê ke nêzanê şorê yan bimanê û merdimê ke hîs kenê ke vengê înan nîno hesnayene. Nê çarçewaya de, krîzê herêmî zî na rewşe gur kenê. Her têgêrayîşê leşkerî, her tehdîd, her xebera pêkewtişî nê hîsî xurt keno ke rewşe eşkena hîna zafêrî bêîstîqrar bibo. Rewşêka winayin de rolê hêzanê girdan belîyo, her çiqas serê rîyê erdî têmîyankewte bêro aseyene zî.
No welat bi pêroyî seba pêardişê aştî nêkewenê mîyanê pêkewtişî la seba pawitena yan hîrakerdena tesîrê xo têgêrenê. Eke seba înan bi feyde bo, ey paştî danê, eke feyde çin bo, ê bêveng manenê yan zî rewşe bi hewayêke rayrabenê ke hemsencîyê hêzî goreyê menfîetê înan vurîyena. Seba înan, no herêm seba merdimê ke îta cuyenê zafêr sey textê santrançî yo.”
‘Neqebê Hurmuzî do serê ekonomîya dinya de tesîr bikero’
Îrfan Geylanî serê muhîmîya Neqebê Hurmuzî de zî erjnayîş kerd û dîyar kerd ke Neqebê Hurmuzî wayîrê muhîmîyêke taybetî ya û vat: “Neqebê Hurmuzî tena seba welatanê herême ney, la seba pêroyî dinya wayîrê muhîmîyêka sereke yo. Na raya tenge yew raya neqilkerdişê enerjîya yê tewr muhîma. Eke na raya bêro astengkerdene, tesîrê ey do leze Rojhelato Mîyanên derbas bibo û bireso ekonomîya dinya.”
‘Îtîfaq her çiqas qels bo zî muhîm o’
Îrfan Geylanî derheqê partîyanê kurdan yê Rojhelatî zî îfade kerd ke terba têkilîyanê xorînan ê kulturî û tarîxî, yewîye her wext ke sey sloganî pêşnîyar kenê çin a û wina vat: “Cîyayî sîyasî, partîzanî û heta herêmî zî kısmêke nê rastîye yê. La eynî wextî de, wexto ke zextî zêde benê yan tehlukeyêke hempar yeno hîskerdene, tewirêke îtîfaqî virazînê; no îtîfaq her çiqas qels bo zî muhîm o.”
‘PJAK hêrseko pêserî û waştenêka tarîxî ya’
Îrfan Geylanî qalê muhîmîya PJAK’î yê sîyasî û komelî, rol û mîsyonê ey, yewîya partîyanê kurdan ê Rojhelatî zî kerd û nê çîyî ardî ziwan: “Endî ca seba nezelalî nêmendo. Wexto ke behsê azadî yeno kerdene nameyê PJAK’î bi zanayîş denklem ra yeno vetene, no tena nerazîbîyayîş nîyo, wedaritişêko bi amanc o. No wedaritiş kokê xo mentiq ra ney, tersî ra gêno.” Geylanî ard ziwan ke PJAK eşkeno bêro rexnekerdene û beno reqîb bêro vînayene la nîno înkarkerdene û dewam kerd: Seba kismêke komelî no name tena sernameyêk nîyo, la PJAK îşaretêko, îmtîhanêko û hêrsêko pêserî û waştenêka tarîxî yo. Estiritişê nê nameyî heme platform û kombîyayîşan, nîno nê manayî ke na rastîye bêro estiritene.”
