Duran Kalkanî îfade kerd ke ganî êdî dewlete game bierza û vat: “Ganî verê ci bêro akerdene ke Rayber Apo bieşko bi hewayêko azad sîyaset bikero. Çareserî bi azadîya Rayber Apoyî bena.”
Kadroyanê Awankerdox ê PKK’yî ra Duran Kalkanî Medya Haber TV’yî de Prosesê Aştî û Komelê Demokratîkî, pêvînayîşê avûkatan ê Îmraliyî yo ke badê 6 serran ame kerdene û kombîyayîşê Komîteya Wezîran a Konseya Ewropa ke heqê hêvî rojevê ci de yo, erjnayî.
Duran Kalkanî derheqê pêvînayîşê avûkatan ê badê 6 serran de nê vatî: “Verê ci zî 2011î ra heta 2019î pêvînayîş nêamebi kerdene û rojeyê mergî tecrîd şiknabi. Nika badê 6 serran avûkatî şîyî, kenê ke pê naye ma şa bikerê. Pêvînayîşê avûkatan ke çîyo normal o, heqê her kesî yo, ard wina yew hale ke pê nê wazenê şarî şa bikerê. Hende neheqîye, bêhuqûqîye kenê dima ra zî caardişê qanûnî sey mucîze ramojnenê. Hetê bînî ra bi vengdayîşê Rayber Apoyî yê 27ê sibate gamê tarîxî ameyî eştene, averşîyayîşî bîyî.
PKK’yî estbîyayîşê xo yê 50 serran qedîna, stratejîya têkoşînê xo yê çekdarî bedilna. Hende bedilnayîşan ra dima, pêvînayîşê avûkan rê ma vejê se. Ma sey akerdişê beranê Îmraliyî bihesibnê? Ma vajê Aştî ameye? Çew eşkeno çîyo winayên vajê? La wexto ke ma vanê tecrîd dewam keno, halê rehîne dewam keno muxatabê ma hêrs benê, pekî na rewşe çîya? Xofeskerdişê PKK’yî 4 aşmî xo dima verdayî, hema gamêka pête nêameya eştene, inkey pêvînayîşê avûkatan sey mucîze yeno ramojnayene.
Qerarê Komîteya Wezîran do tewirê Yewîya Ewropa dîyar bikero
Duran Kalkanî bale ante kombîyayîşê 3 rojan ê Komîteya Wezîran a Konseya Ewropa ke bi rojevê heqê hêvî yeno kerdene, ser o û wina vat: “Komîteya Wezîran a Konseya Ewropa qerarê Mehkemeya Heqanê Merdiman a Ewropa vindarna, nêvînayîşî ra ame. Par nişka ame vîrê ci. Senî bi se. Xora 25 serrî yo Rayber Apo ûca de yo. Di serrî yo bêhûqûq ûca de yeno tepiştene. Goreyê huqûqê înan zî ganî ûca nêro tepiştene. Wezîrîya Edaletî ya Tirkîya eşkera vat qerar do nêro caardene. Komîteya Wezîran a Konseya Ewropa hema eşkera nêerdo ê do çi vajê. La wexto ke çîyêk goreyê hesabê înan bo her çî eşkera kenê, danê pêhesnayene. Ma nizdî ra teqîp kenê. Şar teqîp keno. Kurdî zaf hîsgêr ê. Qerar do demokrasîyê Ewropa zî ramojno. No do bibo îmtîhano tarîxî. Eke reyna sey verî ser nêvinderê, pêgoş bikerê, ê do bibê hemkarê sûcî. Xora heta inkey wina bi. Heme hetan ke no rewşe raşt erjna wina vat.
Ganî kurdî her cade payan ser bê
Rayber Apo wexto ke şi Roma tîya îmkanê çarserkerdişê meseleya kurdan temsîya zerdin de îmkan da Yewîya Ewropa la ê wayîrê ci nêvejîyayî, o fetilna, rayîrê Îmraliyî mojna ci. Ê ke vera îdamî yê Rayber Apo eşt warê îdamî. Wa çew mevajo qey ma nê xo vîra kerdî. Wextê muhakemerdişê Îmrali de înan vatêne qey pêkewtişî nêbenê. Ma nê xo vîra nêkerdî. Ma do çirey xo vîra mekerê. Ma zaf zelal dî ke pêkewtişê Rojhelatê Mîyanênî menfeatê kamî yo. Inkey vera înan wextê têkoşînê aktîfî yo. Semedê averşîyayîşê demokrasîyê Ewropa nê rê hewcedarîye est a. Xora ma verî ewnîyenê xo ra. Şarê kurdî hîsgêr o, ganî dahîna zaf hîsgêr bo. Nê rojê vindertişî nîyê. Roje roja çalakîye ya. Vakur û Rojawan de çalakîye est ê, ganî mevinderê zî. Bitaybetî heta vejîyayîşê qerarî ganî kurdî her cade payan ser bê.”
Duran Kalkanî îfade kerd ke Komîsyonê Meclîsî şarî zaf çî pawitêne la sey pawitiş nêbi û nê vatî: “Tay munaqeşeyê muhîmî bîyî la çend şino mesele ra kewenî dûrî. Nameyê ci Komîsyonê Demokrasî, Wayûbirayî û Pawitişê Mîllî yo la demokratîkbîyayîşî ser nêvindeno. Dîyar nîyo ke komîsyon do Rayber Apoyî reyde pêvînayîş bikero ya nê. Eşkera yo ke her çî pabesteyê AKP’yî yo. Kenê ke her çî bierzê milê CHP’yî la AKP nêeşkena çewî bixapîna.
Rayber Apo qey nêeşkeno komîsyon de qisey bikero?
Devlet Bahçelîyî vatêne wa bêro meclîs de sîyaset bikero, hema zî vano. Serokkomar Tayyîp Erdoganî zî no sey polîtîkaya dewlete girewt dest û wayîrê ci vejîya. Qey hema Rayber Apo nêeşkeno komîsyon de qisey bikero? Ma çîyo ke vat pêro pratîk de ardî ca, la hetê bînî ra qet gamêke nîna eştene. Ma tim zelal têgêrayî. Rayber Apoyî veng da û ma zî waştişê ci ardî ca. Ma kongre de qerarê hîrê madeyan girewt. Madeyê ma wina bî: Yew ma falîyetanê PKK’yî vindarnenê, estbîyayîşê ci yê rêxistinî qedînenê. Didi stratejîya têkoşînê çekdarî qedînenê. Hîrê caardişê nê wird qeraran têna bi îdarekerdişê fîlî yê Rayber Apoyî beno.
Yanî ma îdareyî dewrê Rayber Apoyî kenê. Rayber Apo zî vano ez do pêrune bikerî. Nika ganî madeyê hîrêyin bêro caardene. Eke avûkatî 6 serran de rayêke ey vînenî no senî beno? Hinî her çî pabesteyê Rayber Apoyî yo. Eke şima raşta çareserîye wazenê no bi Rayber Apoyî beno. Heta ke Rayber Apo rehîne bo şervanî çeka canêverdenê. Tay vatişî est ê ke… Ma xo zor tepişenê, sebir kenê. Ganî Rayber Apoyî rê raşt bêro nizdîbîyayene. Ez eşkera vajî; mesele, her çî Rayber Apo çareser keno. Eke raşta Aştî yena waştene wa şertê Rayber Apoyî bêrê bedilnayene. Kilîtê çareserî ûca de yo.”
