Ser mergê Yilmaz Yakutî yê bi nasname Kalo ke goş nêdaynî binçimkerdiş, îşkence û gefanê kiştişî kûçeyanê Amedî de rojname vila kerdî, 3 serrê derbas bî ke rehmet kerdo. Kalo hem generalê şenikî yê Apê Musa bî hem zî berxê mayan bî.
16ê Çeleyê 2022î de Kaloyê Çapemenîya Azade Yilmaz Yakut, rîyê nêweşîya laşê ganwerî ra cuya xo da. Kalo, serrê 90î de demo ke Kurdistan de tewro zaf qewimyayişê vînîkerdiş, kiştişê kerdox nêdîyar, binçimkerdiş û hepskerdişî ameynê kerdiş vilakerdoxî kerdinî, Çapemenîya Azade de dest bi xebate kerd. 14 serrîya xo de destpê vilakerdoxîya Rojnameyê Ozgur Gundemî kerd. No dem zaf rayan ame binçimkerdiş û raştî îşkenceyê giran ame.
Rojêka zimistanî ya serra 1993î de demo Cadeya Melîk Ahmetî ya qezaya Surî de rojname daynî aboneyan, hetê endamanê Hîzbullahî bi satoran raştî hêrişê ame û birîndar bî la têkoşînê xo ra fek veranêda.
Kalo, demo ke dibistan qedîna sifte kûçeyan de dendike rot û peynî zî atolyeya posteyî de xebitya. Peynî destpê vilakerdoxî kerd. Demo ke keyeye ra vejyaynî maya ey peynîya ey de awa vila kerdine, dîyar nêbî ke şan de keyeyê xo biagêro. Maya ey her tim ci ra vate; ti merdimo şerefdar reyde xebityenî, ez ti emanetê sifte Homayî, peynî zî nê merdiman kena.
Rojêk pîyê ey, ci ra nêvato rojname vila mekere. Kalo demo ke rojname vila kerdinî eke dikan de merdimo xerib bivînaynî qet rojname teslîm nêkerdinî, çimkî no dem wendoxê rojnameyî zî ameynî hedefgirewtiş.
Generalê Şenikî yê APÊ MUSA
Vilakerdoxê rojnameyî ra generalê şenikî yê Apê Musayî ameynî vatiş. Hema zî no dem vilakerdoxê rojnameyî kerdinî înan ra generalê Apê Musayî yeno vatiş. Apê Musa nuştoxê Rojnameyê Yenî Ulke û dima zî Ozgur Gundemî bî, ray ray nê vilakerdoxan reyde ameynî têhet. Kalo seba Apê Musa wina vatê; mi nêzanaynî Musa Anter o, seba mi merdimo îxtîyar yanî Apê Musa bî.
Nêçare karê boyaxkerîya solan kerdî
Kalo tewro kêm 300 ray yeno binçimgirewtiş, rojêk polîsan ey teqîp kenê, o zî nêçare keyeyêk de xo nimneno û wayîrê keyeyî ciniyêk û Kalo ra vano: “Dengê xwe meke berxê min, kes nikari te ji ba min bibe”. Binê linganê Kaloyî de her tim poşetêko gird estbî, çimkî Kalo karê boyaxkerîya solan zî kerdî, çimkî êdî îxtîyar bî nêeşkîyaynî karê vilakerdoxî bikero.
Kalo de nêweşîya sara (epîlepsî) zî estbî, seba ke îşkence dîbî, no ser qewetê xo yê fizikî vînî kerdbî la qewetê xo yê têkoşêrî ra çik vînî nêkerdbî. Çi heyfo ke Kalo nêweşîya laşê ganwerî ya mîdeyî ra rehmet kerd. Embazanê ey, nêweşxane de ci rê wayîr vejyayê, na ray Kalo nêweşxane ra nêwarişt pay û resa embazê xo yê bînî yê Generalê Apê Musayî.
Ez zî Kalo rojnameyê Azadîya Welatî de şinasnaya, ganî nika ra pey têkoşêrê Çapemenîya Azade ra wayîr bêro vetiş, çimkî eke mîyanê ti feqîr bibî, nê malbatê to nê zî komel to rê wayîr vejîyeno.
