Serekwezîrê Kanadayî Mark Carneyî dimayê 8 serran muxalefetê Serekê Amerîkayî Donald Trumpî reyde şi Pekîn û Serekê Çînî Xî Jînpîngî reyde pêvînayîş kerd.
Serekwezîrê Kanadayî Mark Carneyî dimayê 8 serran şî Çîn zîyaret kerd. Zîyaret 16ê çeleyê 2026î de ame kerdene. Paytextê Çînî Pekîn de Serekê Çînî Xî Jînpîngî reyde pêvînayîş kerd. Sebebo ke no zîyaret bi rojev nîqaşê mabênê Amerîka û Kanada yê.
Donald Trump kampanyaya weçinitişê peyên ê Amerîka de behsê îşxalkerdişê Kanadayî kerd û dima ke ame weçînitene zî bacê Gumrikî yê malzemeyanê Kanada ser o vêşî kerd. Seba nê hedîseyan alozîya mabênê her di welatan her ke şono xorînêr benê.
Hemkarîya her di qeraxanê Okyanûsê Gird
Serekwezîrê Kanadayî Mark Carneyî wesfê pêvînayîşê bi Serekê Çînî Xî Jînpîngî reyde da û dîyar kerd ke no pêvînayîş 8 serran ra pey ameyo kerdene. Sewbîna bi nê pêvînayîşî ê “hemkarîyêka newa û stratejîk” awan kenê.
Dostanîya dimayê kaosî yena germkerdene
Verî ke no pêvînayîş bêro kerdene kaosê vêşî mabênê Kanada û Çînî de est bîyê. Her di welatan vera yewbînan mîsîlleme kerd. Na çarçewa de Kanada name û hesabê Amerîka ser o welatijê Çînijî girewtê û Çîn zî seba cewabdayîşê welatijê Kanadayî destbend kerdê. Nê cewabê vera yewbînan qadê bazirganî de hîna zaf bîyê. Heta demêko derg mabênê her di welatan de tezad û kaosê dîiplomatîkî xo mojna.
Çîn û Kanada stratejî awan kenê
Serekwezîrê Kanadayî Mark Carneyî kombîyayîşê Salona Girde ya Şarî ya Çînî de waşt ke no pêvînayîş bibo sebebê averberdişê yewîya her di welatan a stratejîk.
Xi Jînpîng: Rîpelêko newe yeno akerdene
Serekê Çînî Xî Jînpîng kombîyayîşî de bale ant kombîyayîşê teşrîna verêne yê 2025î yê APEC’î û da zanayene ke no kombîyayîş seba her di hetan wayîrê rolêko mîladî yo. Xî Jînpîng eşkera keno ke kombîyayîşê parî seba averşîyayîşê mabênê her di welatan bi rîpelêko newe. Xî Jînpîngî seba nê averşîyayîşo pozîtîf keyfweşîya xo îfade kerde. Kombîyayîş û detayê kombîyayîşî keyfweşî û razîbîyayîşê her di welatan mojneno. La aseno ke rojevkerdişê nê pêvînayîşan manayê xo yê bînî zî est ê.
Stratejîyê mabênê Kanada û Amerîka serê lengerîyo
Kanada û Amerîka 8 hezar û 891 kîlometre sînor pare kenê, endamê NATO’yî yê û dewamê kultirê Ewropa yê û mutefîkê stratejîk ê. Hemkarîya sîstemê aborî û sîstemê leşkerî zî parçeyêkê nê stratejî yê. Dimayê sîyasetê Serekê Amerîkayî Donald Trumpî dayîşûgirewtişê mabênê Kanada û Amerîka zî serûbin benê.
Dimayê pêvînayîşê Mark Carney û Xî Jînpîngî çimê her kesî sîyasetê Amerîka û bi taybetî zî Donald Trumpî de yo. Goreyê tayê derûdoranê pispor do Donald Trump vera nê pêvînayîşî sîyasetê xo yê vera Kanadayî tûjêr bikero. Goreyê tayê analîstan zî do encamê nê cigêrayîşê Kanadayî Donald Trumpî ser o tesîr bikero û sîyasetê xo yê vera Kanada û mutefîkanê xo yê bînan çiman ra vîyarno.
Demê vîyarte yê kaosê mabênê Çîn û Amerîka
Kanada waştişê Dewletanê Yewbîyayeyan ê Amerîka (DYA) ser o kênaya Awankerdoxê şîrketê telefonê Huaweiyî girewte û Çînî zî seba cewabdayîşî di welatijê Kanadayî bi manayê casûsî girewtê. Dimayê nê her di hedîseyan serra 2028î ra heta nika têkilîyê her di welatan her ke şi xirabêr bîyê.
Dimayê sîyasetê Donald Trumpî Amerîka bacê Gumrikî yê malzemeyanê Kanada yê sey hesin, alumînyum, hacetê teknîkî û keresteyan ser o zaf vêşî kerd. Nê qerarê Washingtonî Kanada bêçare mende ke tay rayîr û rêbazanê bînan seba xo peyda bikerê.
