Endamê Konseya Rayberdişî ya KCK’yî Mustafa Karasuyî derheqê hêrişê îşxalî yê vera Rojawanî de semedê têkoşîn veng da şarê kurdî û hêzanê demokrasî û vat, “No hêriş têna vera Rojawanî nîyo, vera heme kurdan o.”
Endamê Konseya Rayberdişî ya KCK’yî Mustafa Karasuyî derheqê hêrişê çeteyanê HTŞ û DAÎŞ’î yê ke bi koordîneyê dewleta tirke vera Rojawanî yenê kerdene de veng da şarê kurdî û hêzanê demokrasî.
Karasuyî ard ziwan ke no hêriş têna vera Rojawanî nîyo, vera heme kurdan o û venga da kurdan û hetanê demokratîkan ke semedê pawitişê Şorişê Rojawanî wa têkoşîn bikerê.
Mesajê Karasuyî wina yo:
“Heme şarê kurdî, hêzanê demokrasî rê, heme têgêrayîşanê şorişgêr demokratîkan ê dinya rê!
Na hele vera Rojawanî vera şarê kurdî hêrişê giranî yenê kerdene. Nê şarî 2014 û 2015 de vera hêrişanê DAÎŞ’î bi hewayêkê fedayî xover da, nê şarî vera hêrişanê DAÎŞ’î xo kerd barîkat, xo semedê merdimîye kerd barîkat, bi des hezaran şehîd û birîndarî dayî. Şarê ke wina semedê merdimîye şer kerd, têkoşîn kerd, ewro bi komployêkê mîyanneteweyî, bi komloyêke hêzê mîyanneteweyî zî tede yê yeno waştene ke bêro eciqnayene, yeno waştenê ke sîstemo demokratîko ke nayo ro bêro vilakerdene.
Şêxmeqsûdî ra hêrişanê bêkurdkerdişî dest pêkerd û nika hêrişo ke Rojawan de yeno kerdene hêrişê qirkerdişî yê vera heme kurdan o. No hêriş pêro şarê ma yê çar parçeyanê Kurdîstanî eleqedar keno. Çike no hêrişê qirkerdişî yo. Ganî pêro şarê ma na raştîye bivîno. Vera kurdan komployêk est o. Têkoşînê azadîye yê kurdan semedê menfeatê mîyanneteweyî û herême yeno eciqnayene. Wanê destkewteyanê kurdan werte ra wedarê û îradeyê xoverdayîşî û eşqê azadîye yê kurdan bişiknê. No hêrişê îradeyê azadîye yê pêro kurdan o, hêrişê vera îradeyê estbîyayîşî yo.
Nê hetî ra heme şarê ma yê Kurdîstanî, şarê ma yê çar parçeyan ganî wirzo payan ser û paştî bido şarê ma yê Rojawanî. Heme şarê ma şewe roje ganî paştî bido xoverdayîşê şarê Rojawanî. Sere de Vakur û Başûrê Kurdîstanî ganî paştî bidîyo Rojawanî. Ganî bi ruhê xoverdayîşê Kobanê paştî bidîyo xoverdayîşê Rojawanî. Kobanê de 2015 de têna bi xoverdayîşê şervanan serkewtiş nêame, bi paştdayîşê kurdan û dostan Kobanê ser kewt. Coka ewro wextê ci yo ke sey wextê Kobanê têkoşîn bêro xurtkerdene.
‘Vera kurdan polîtîkaya qirkerdişî est a’
Coka ganî ma zaf hîsgêr bi. Vera kurdan polîtîkaya qirkerdişî est a. Wa no bêro vînayene. Beno ke siba zaf erey bo, nika ra ganî her kes wirzo payan ser. Sere de cinî û ciwanî ganî paştî bidîyo têkoşînî. Ciwanîya kurdan semedê nê rojan est a. Ganî her ca de wirzê payan ser. 2014 de sînorê Pirûs-Kobanê vera DAÎŞ’î bi cayê sembolê têkoşînî. Ewro zî her ca de ganî wina têkoşîn bêro mojnayene. Eke çar parçeyê Kurdîstanî tewirê seypêyî ramojo nê hêrişî eşkenê bêrê şiknayene. Hêzê sîyasîyî yê Kurdîstanî zî vera nê hêrişan berpirsîyar ê, ganî berpirsîyarîya xo ya tarîxî bîyarî ca.
Rojawan de ereb, kurd û suryanî xeylê serrî yo pîya mîyanê huzurî de ciwîyenê. Ewro HTŞ wazeno nê şaran biverdo pê, bitaybetî wazeno pêkewtişê kurd-ereban vejo. Ganî şar nê kayê leyminî rê nêxapîyo. No zirar dano her di hetan zî. Ganî bi pêro şarî, dostî û hêzê demokrasî bi ruhê xoverdayîşê Kobanê paştî bidê Rojawanî.
Biji Berxwedana Rojava, Biji Gele Kurd!”
