Fermandarê HPG’yî Murat Karayilanî dîyar kerd ke ganî Newroza emserrî biba “Newroza Azadîya Rayber Apoyî” û vat ke ganî dewlete gamanê şênberan bierza.
Fermandarê HPG’yî Murat Karayilan ajansê ANF’î rê roportajêko taybet da û vat ke prosesê çareserîya meseleyê kurdan qonaxêko newe de yo û ma nuqtaya vurîyayîşêko tarîxî ra vîyarenê.
Prosesê çareserî
Karayilanî vat ke Rayberê Şarê Kurdî Abdullah Ocalanî bi eşkerayîya 27ê sibate 2026î qonaxo dîyin da destpêkerdene û no qonaxo newe êdî gamanê şênbe û qanûnîyan wazeno. Karayilanî vat ke rolê dîyarker rasterast Meclîsê Tirkîya yo û aşma nisane do bibo warêko krîtîk. Karayilanî vat: “Azadîya Rayber Apoyî şerto bingeyin o. No waştiş tena yê têgêrayîşî nîyo, bîyo waştişê hempar ê beşanê girdan ê şarî û raya mîyanneteweyî zî.”
Şehîdî
Karayilanî bi hurmet Salih Muslim, Sırrı Sureyya Onder, Huseyîn Aykol û Selîm Sadak ardî vîrî. Derheqê Salih Muslimî de Karayilanî wina vat: “Ez ey serranê derg ra nas kena. Badê ke 1983î de Rayber Apoyî reyde ame têhet, qerar da ke Têgêrayîşî reyde şêro. Bi erebkîya xo ya weşe kedê girdî dayî açarnayîşê fikr û felsefaya Rayber Apoyî. Partî de qadro nêbî la sey qadroyo pêroyî yê şorişî xebitîya.”
Şerê Îranî
Karayilanî vat: “No şero ke dewam keno Şerê Dinya yo Hîrêyin o û seba ke herême goreyê feydeyê xo newe ra dîzayn bikero, yeno ramitene. Ma nê şerî de hetê tu kesî de nîyê, xeta ma ya hîrêyine ya azadîye û demokrasîya şaran est a. La no şer zerar dano her kesî, bi taybetî şarê ma yê Rojhelatê Kurdîstanî tesîrdar keno.”
Stratejîya miletê demokratîkî
Karayilanî vat: “Stratejîya Miletê Demokratîkî eseranê tewr girdan ê Rayber Apoyî ra yew a. Neteweperestîya tenge rolê şarê kurdî teng kena. Dişmenê şarê kurdî tewr zêde sîyasetê miletê demokratîkî ra tersenê. Ewro Rojavayê Kurdîstanî de sîyasetê miletê demokratîkî kurdan şêno bikero hêzêko bingeyin ê sîyasetê Sûrîye.”
Yewbîyayîşo demokratîk
Karayilanî vat: “Şarî pratîk de yewbîyayîşê xo viraşt la sîyaset apey mend. Şar vernîya sîyasetê kurdî de şî. Hewceyîya kurdan bi yewbîyayîşêko demokratîk est a. Ma naye sey babetêka stratejîke gênê çiman ver. Ma vanê ‘bê naye nêbeno’. Fikrê ma şênê cîya bibê la bingeyê feydeyanê neteweyî û hemparan ser o yewbîyayîş hewce yo.”
Çekveradayîş
Karayilanî vat: “Qonaxê çekveradayîşî ganî hetê Rayber Apoyî ra bêro rayraberdene. Gerîla wazenê Rayber Apoyî rasterast bivînê û dîyalogî de bibê. Tena bi vejîyayîşê tayê qanûnan ê çekveradayîşî qet bes nîyo. Sere de Rayber Apoyî azadîya ci, dima statuyê qanûnî yê kurdan ganî bêro çareserkerdene.”
Mesajo peynî
Karayilanî vat: “Ma wazenê ke Newroza 2026î biba Newroza raştikêne ya azadîye, yanî Newroza Azadîya Rayber Apoyî. La ganî kes peygoş nêkero û fek heme çîyan ra nêverdo. Her çî şêno eksê ci de zî aver şêro û hêrişê girdî ma ser o bêrê. Ma seba her di îhtîmalan zî amade yê. Ma têgêrayîşêko tecrubedar, bihêz û komelkî yê. Ma çareserîye wazenê la eke çareserîye nêbo, ê halî rê zî ma amade yê.”
