Sîyasetmedaranê DBP’yî seba vîrardişê kadroyanê PKK’yî yê pêşengan Alî Haydar Kaytan û Riza Altunî ke do 17ê gulane de Dêrsim de bêro kerdene, vengda her kesî ke beşdarê programê vîrardişî bibo.
Kadroyê PKK’yî yê pêşengî Alî Haydar Kaytan û Riza Altun xeylê şaristanan de yenê vîrardene. Seba Kaytan û Altunî 17ê gulane de zî do Dêrsim de vîrardişêko girseyî bêro kerdene. Vîrardiş do saete 13:00î de Qada Sey (Seyîd) Riza de bêro kerdene.
‘Ganî her kes wayîrê gedeyanê xo vejîyo’
Hemsereka Partîya Herêman a Demokratîke (DBP) ya Dêrsimî Selvî Gungormuş vengda heme welatijanê Dêrsimî ke beşdarê programê vîrardişî bibê. Selvî Gungormuş wina vat: “Tirkîya prosesêko tarîxî de yo. Ma prosesêko tarîxî de yî ke do dayîkî nêbermê, zilm çin bo û problemî bi rayîranê demokratîkan bêrê çareserkerdene. PKK’yî çend rojî ra ver kongreya xo viraşte û aye dîyarî Kaytan û Altunî ke cuya xo vîndî kerde, dîyarî înan ameye kerdene. Do Dêrsim de programê vîrardişî bêro kerdene. Ma veng danê heme şaranê Dêrsimî ke beşdarê programî bibê. Ganî her kes wayîrê gedeyanê xo vejîyo.”
Vengda beşdarbîyayîşî kerd
Sîyasetmedarê DBP’yî Mehmet Zirig zî dîyar kerd ke vengdayîşê 27ê sibate yê Rayberê Şarê Kurdî Abdullah Ocalanî û qerarê kongreyî seba averşîyayîşê sîyaseto demokratîk xeylê muhîm ê û vat: “Yewane rayîrê xelasbîyayîşê pêkewtişê Rojhelatê Mîyanênî bi aştî û dîyalogo ke birêz Ocalan bale anceno ser o mumkin o.”
Zirig îfade kerd ke Kaytan û Altun têkoşînê aştî û awankerdişê komelê demorkatîkî de kesayetê sembol î û nê vengdayîşî kerd: “Nê semedî ra zî ganî qerardarîyêka ke no têkoşîn do senî bêro rayraberdene, bêra mojnayene. Seba ke vîrardiş xurt vîyaro ma venga heme şarê xo danê.”
