Hemserekîya Konseya Rayraberdişî ya KCK’yî derheqê pîrozkerdişê Newroza 2026î de eşkerayîyêka nuştekîye weşanaye û heme şaran rê ke bi mîlyonan beşdar bîyî û kede daye, sipas kerd.
KCK’yî eşkerayîya xo de vat: “Bi hezaran serrî yo ke sere de kurdî û şarê Rojhelatê Mîyanênî Newroze sey ‘Roşanê Newebîyayîş, Xoverdayîş û Wisarî’ pîroz kenê. Newroza emserî bi şîarê ‘Rayber Apoyî rê Azadîye, Yewbîyayîşê Kurdan o Demokratîk’ her cayê Kurdîstanî ra, teberê welatî ra, zaf merkezanê Tirkîya de û Waranê Pawitişê Medya de bi coşêko gird ame pîrozkerdene. Na Newroze nika ra bi coşê xo yê girdî, sewîyeya beşdarîya girseyî û mesajê tarîxî ke da, vîrê şarî de ca girewt.”
KCK’yî vat: “Bi na hişmendîye Newroza 2026î de şarê kurdan û şarê ma bi des mîlyonan Prosesê Haştî û Komelê Demokratîkî rê bi hêzê tewr xurtî wayîr vejîyayî û nîşan da ke hetê Rayber Apoyî de yê ke mîmarê prosesî yo. Şarê ma heme meydananê Newroze ra bi hêzê tewr xurtî azadîya fîzîkîya Rayber Apoyî waşt.”
KCK’yî vat: “8ê adare ra dima Newroze de zî ciwanî, cinîyî, şarê kurdan û gerîlayanê azadîya Kurdîstanî û pêşengîye kerde û eşkera kerd ke êdî wazenê Rayber Apoyî fîzîkî mîyanê xo de bivînê û tahammulê esaretê ci nêmendo.”
KCK’yî vat: “Şarê ma ke bi roşnîya Rayber Apoyî şûurdar bîyo fina nîşan da ke seba yewbîyayîşê demokratîkî yê kurdan amade yo û venga rêxistinanê sîyasîyan ê kurdan da ke lez vera talûkeyan yewbîyayîşê xo yê demokratîkî awan bikerê.”
KCK’yî vat: “Şarê ma ke na Newroze de resa Manîfestoya Komelê Komunalî yê Demokratîkî, manîfesto bi kelecanêko gird pêşwazî kerd û nîşan da ke seba prensîbê awankerdişê komelê demokratîkî amade yo.”
KCK’yî peynîye de vat: “Eşkera yo ke Newroza 2026î Prosesê Haştî û Komelê Demokratîkî rê hêzêko zaf gird da, înanê ke hesabê xeletî kerdî, hişyar kerd û êyê ke têkoşînê azadî û demokrasî kenê, înan rê zî hêzêko gird da. Ma bi nê wesîleyî heme kesê ke kede daye ke Newroza 2026î bi girsîye bêro pîrozkerdene sipas kenê û newe ra Newroza Rayber Apoyî, Şehîdanê ma yê Qehremanan, Cinîyan, Ciwanan, Şarê ma û heme Şaran pîroz kenê.”
