KCK’yî ke Şêx Seîd û embazê ci yad kerdî, vat: “Şarê kurdî nê prosesî zî do bi serkewtişî aver bêro û têkoşîno ke Şêx Seîdan ra heta roja ma bi bedelanê girdan ame dayene, ser bifîno û hesretê azadîye bifîno dest.”
“Şêx Seîd û embazê ci ke vîrê şarê kurdî de cayo xorî girewto û ma her tim bi hurmet û mînetî yad kenê, îdamê înan ra dima 100 serrî ravîyartî. Ma reyna Şêx Seîd û embazanê ci bi hurmetî yad kenê û şexsê înan de pêro şehîdanê şoriş û demokrasîyî bi mînetî yad kenê. Komxebata ke KNK bi wesîleya 100. serre keno ma bimana vînenê.
Şêx Seîdî sey welatperwerê cesur, zanist û hîsgêrî û serkêşê şarê xo neheqîya ke kurdî raştê ci ameyî qebul nêkerd, vera înkarê vera kurdan vejîya. Têkoşînê ke ey da îtîrazo tarîxî yê vera neheqîye û înkarî yê serê şarêkî yo. Dewleta faşîsta qirker çend biwazo bi qirkerdiş û îdaman têkoşînî bifatisno zî înan dewaya xo ra tewîz nêda, bi tewirê xo Kurdîstan de tradîsyonê xoverdayîşî aver berd. Netîcaya têkoşînê Şêx Sedî û Seyît Rizayan de Kurdîstan de têkoşîn û xoverdayîş kêm nêbîyî, heta vejîyayîşê PKK’yî nê prosesî wina dewam kerd. Bi vejîyayîşê tarîxî yê Rayber Apo û PKK’yî têkoşînê Şêx Seîd û embazanê ci kewt merhaleyêka tarîxî ya newî, şorişê ganîbîyayîşê neteweyî ame ca û sîyasetê înkar û îmhayî ame şikitene.
Têkoşîno tarîxî yê şarê kurdî wina heta ewro ame. Nika bi “Vengdayîşê Haştîye û Komelê Demokratîkî” yê Rayber Apoyî no têkoşîn kewto merhaleya înşakerdişê azadîya şarê kurdî. Şarê kurdî nê prosesî zî do bi serkewtişî aver bêro û têkoşîno ke Şêx Seîdan ra heta roja ma bi bedelanê girdan ame dayene, ser bifîno û hesretê azadîye bifîno dest û waştişê Şêx Seîdî bîyaro ca. Wa qet şikê çewî çîn bo, şarê kurdî do nê ser bifîno. Ma bi nê fîkr û bawerîye reyna şexsê Şêx Seîd û embazanê ci de pêro şehîdanê şoriş û demokrasîyî bi hurmet û mînetî yad kenê, sozo ke ma dayo şehîdan newe kenê.”
