Hemserekîya Konseya Rayraberdişî ya KCK’yî, erdlerzê 6ê sibate de kesê ke cuya xo ra bîyî, yad kerdî û vat ke dejê şaran parê kenê û komelî reyde piştîpêdayîş de yê.
Hemserekîya Konseya Rayraberdişî ya KCK’yî eşkerayîyêk daye û vat: “Erdlerzê 6ê sibate ke bi des hezaran însanan ganê xo da û xirabîyêko girs ard, tira 3 serrî vîyartî. Verê heme çîyan ma kesanê ke nêzdîyê xo vindî kerdî, serweşîye wazenê, birîndaran rê şîfa wazenê û dejanê înan ê girdan parê kenê.”
Eşkerayîye de wina ame vatene:
“Çi heyf ke 3 serrî vîyartî la birînê erdlerzî hema baş nêbîyî. Êyê ke berpirsîyarîya tewr girde yê înan a, goreyê na berpirsîyarîye haraket nêkenê. Plan û projeyê ke heta nika ameyî viraştene bes nîyê û waştişê înan başkerdişê dejanê şarî nîyo, qezencê xo yo. No zihniyet rantkar û kolonyalîst, esasê nê xirabî û dejan o. Eke herinda rant û qezencî de goreyê taybetîyanê cografya awanbîyayîşêk biameyêne viraştene, hende dej û xirabîye nêbîyêne.”
KCK’yî ard vîrî ke felaketê xozayî bi tedbîran eşkenê bêdej û bêmerg bivîyarê û no îsbat bîyo. La seba ke tedbîrî nêameyî girewtene û herinda viraştişê raştî de rantkarîye ameye kerdene, her felaketêk de şarî dejê giranî dîyî. Eşkerayîye de sewbîna ame vatene ke piştîpêdayîşo ke erdlerzî ra dima komelî de vejîya, nimûneyêko muhîm ê xoîdare û rêxistinbîyayîşê demokratîkî bî û ganî no piştîpêdayîş bi awanbîyayîşo demokratîk bêro dewamkerdene.
