KCK’yî badê hêrişanê vera Helebî polîtîkayê dewleta tirkan bi şîdet rexne kerdê û vat ke hêrişê vera Helebî seba xirabkerdişê adirbestî yo û ganî game û çalakîyê sabotekerdoxê prosesî ra dûrî bêrê vindertene.
Hemserekîya Konseya Rayraberdişî ya KCK’yî, derheqê hêrişanê vera taxanê kurdan ê Helebî û proses û polîtîkayanê dewleta tirkan de eşkerayîyêka nuştekîye weşanaye.
Eşkerayîye de wina ame vatene: “Taxanê kurdan ê Helebî ser o hêriş bî ke ê taxî bibê taxê bêkurdî. Nê hêrişî bingeyê dişmenîya kurdan hedef gênê ke sîstemê xoser ê demokratîkî ke şarê kurdî bi ereb, suryan û şaranê bînan xo de hewineno, heme Sûrîye ra tasfîye bikerê.
Gama ke çeteyan bi paştîdayîşê dewleta tirkan vera Şêxmeqsûd û Eşrefîye hêriş da destpêkerdene, hêzanê asayîşî dest bi xoverdayîşê xopawitişî kerd. Vera hêrişanê bêkurdkerdiş û çînkerdişê xopawitiş heqo meşrû yo. Şarê nê her di taxan çarçewaya pêkerdişê 1ê nîsane de îdareyê xo yê xoserî yê demokratîkî pawitêne. La hêzê ke Sûrîye de demokrasî nêwezanê Şêxmeqsûd û Eşrefîyê ra dest bi hêrişan kerd ke Îdareyê Xoserî ke Sûrîye de sîstemo demokratîk nayo ro, orte ra wedarnê. Înan ke vera nê hêrişan bi hewayêkê qehremankî xover da û şehîd bîyî, ma înan bihurmet yad kenê û gazîyanê xopawiitşî rê şîfaya lezabeze wazenê. Ma veng danê şarê xo ke taxanê xo ra ame vetene û waranê bînan ra vila bi, wa heqê xo yê meşrûyî bişuxulne û agêro cayê xo. Vîrê şehîdan û bedelê ke ameyî dayenê do Sûrîyeya demokratîke û îdareyanê xoseran de bêrê ciwîyayene.
Baldar o ke nê hêrişî ca de badê pêvînayîşê Amerîka, Îsraîl û Îdareyê Şamî û Wezîrê Karanê Teberî yê Hakan Fîdanî ameyê kerdene. Roja ke pêkerdişê wa başûrê Şamî Îsraîlî rê bêro verdayene ame kerdene, Heleb de vera taxanê kurdan hêriş dest pêkerd. Pêvînayîşê Şamî ameyî birnayene û taxê ke 1ê nîsana 2025î de statuyê ci ame bewlîkerdene raştê hêrişî ameyî. No zî mojneno ke Amerîke û hêzê mîyannteweyî yê ke herême de înan zî no hêriş qebul kerd ya zî ameyî bêvengkerdene. Yeno zanyene ke Amerîka û Fransa mabençîya pêvînayîşanê Şam û heyetê Rojawanî kenê.
Dewleta tirke xora destpêkî ra nat Heleb de mîyanê hêrişanê vera taxanê kurdan de ya. Eşkerayîye selahîyetdaranê dewleta tirke û medyaya ke îqtîdarê AKP-MHP’yî ra nizdî ya eşkera nê mojnenê. Çapemenîye û selahîyetdarê dewleta tirke senî ke artêşa tirke şer kena nizdî biyênî. Xora fermandarîya HSD’yî eşkera kerd ke dron û tanqê dewleta tirkan ameyî şuxulnayene. Ame vatene ke tay subayanê tirkan zî rayraberdişê şerî de ca girewt. Polîtîkaya dewleta tirkan ya vera HSD’yî dişmenîya vera kurdan fînena çiman ver. Uslib û hêrişê înan ê vera kurdan û Têgêrayîşê Azadîye yê Kurdan ke verê vengdayîşê Rayber Apoyî yê 27ê sibata 2025î ameyêne kerdene, Heleb de wextê hêrişê bêkurdkerdişî de ame domnayene.’”
KCK’yî vat ke PKK’yî xo fesih kerdo û 1ê adare 2025î ra nat rewşa adirbestîye est a, hêrişê vera taxanê kurdan hêrişê Têgêrayîşê Azadîye û adirbestî yê ke bi baldarîye yenê caardene û wina dewam kerd: “Hem behsê prosesêk yeno kerdene hem zî Têgêrayîşê ma rê heqaret beno û hêriş benê! Bi nê nêzdîbîyayîşî Vengdayîşê Aştî û Komelê Demokratîkî yê Rayber Apoyî ke verdayîşê têkoşînê çekdarî û adirbestîye ser o senî dewam bikero?”
KCK’yî vat: “Ma prosesê aştî û komelê demokratîkî de berpirsîyarîyê ke ma ser o yê bêtereddut û bi cesaret ardî ca; ma hukmatê AKP û MHP’yî û wezîfedaranê dewlete zî rê vengdanê ke seba serkewtişê prosesê aştî û komelê demokratîkî gamanê laziman bierzê. Ganî şarê ma û hêzê demokrasî zî seba vindarnayîşê polîtîkayanê dewleta tirkan ê ke prosesî sabote kenê, bingeyê demokratîkî de têkoşînî berz bikerê.”
