Hemserekîya Konseya Îdareyî ya KCK’yî seba şehîdbîyayîşê Salih Muslumî mesajê serweşîye weşana û vat: “Embaz Pîyê Welatî ke Rayber Apoyî reyde nêzdî ra û nimûneyêk embazîye kerda, rêça îdeolojîk û teorîke ya Rayber Apoyî têkoşînê xo de esas girewt.”
Hemserekîya Konseya Rayraberdişî ya KCK’yî seba ke Salih Muslum rîyê nêweşîya gurçikan ra şehîd bî, mesajê serweşîye weşana û vat: “Embaz û Pîyê Welatî ke Rayber Apoyî reyde nêzdî ra û nimûneyêk embazîye kerda, rêça îdeolojîk û teorîke ya Rayber Apoyî têkoşînê xo de esas girewt.”
Eşkerayîya KCK’yî wina ya:
“Salih Muslumî PKK’yî reyde nêzdîbîyayîşê xo ra pey 40 serrî têkoşînê azadîye û demokrasî de ca girewt. Rayber Apoyî reyde nêzdîbîyayîşê xo ra dima aktîf beşdarê têkoşînî bî û seba averberdişê nê têkoşînî keda girde daye. Têkoşînê xo bi giranî Rojavayê Kurdîstan û Sûrîye de kerd, la hertim 4 parçeyanê Kurdîstanî de têkoşînê azadîye rê hesas bî û her hetî de xizmetê muhîmî kerdî.
Hemrayê ma Ebu Welat Unîversîteya Îstanbul Teknîk ra mezun bî û Erebîstana Suûdî de xebitîya. Uca de zî beşdarê xebatanê Têgêrayîşê Azadîye bî. Dima emrê xo heme têkoşînê azadîye rê feda kerd, tena xo ney, bi keyeyê xo heme beşdarê nê têkoşînî bîyî û bîyî militanê ci. Lajê ci Şervan zî 2013î de Girê Spî de şehîd bî.
Warê çapemenî û weşanî de zî Têgêrayîşê Azadîye rê xizmet kerd. Kurdkî ra teber tewr kêmî 3 ziwanî zanayêne û çareserî û pawitişanê Rayber Apoyî çarnaybî erebkî, wina mîyanê şaranê ereban de bî wesîleyê vilabîyayîşê fîkranê Têgêrayîşê Azadîye.
Ebu Welat şorişê Rojawanî de zî keda girde daye. Xoverdayîşê Kobanî de zî erjê moralî bî û nameyê Salih Muslumî hertim şorişê Rojava reyde bêro vîrardene. 1990an de hetê rejîmê Baasî ra îşkence dî û amancanê ci ra yew zî demokratîkbîyayîşê Sûrîyeyî bî. Şorişê Rojava hertim demokratîkbîyayîşê Sûrîye reyde pîya girewt xo dest û seba demokratîkbîyayîşê Rojhelatê Mîyanênî de zî zaf cehd kerd.
Ebu Welatî nêweşîye qet nêdekerd vernîya xebata xo. Seba ci muhîm o bî ke têkoşîn aver şêro û bireso amancê xo. Seba ke bawe kerdêne ke rêça Rayber Apoyî de têkoşîn bê şik û reseno serkewtiş, heta peynîya nefesê xo moralê xo berz tepîşte. Her roja xo bi coşê şorişgerî vîyarna.
Ebu Welat hertim sey şorişgerêko demokrat yê mutewazî û şarperest ke girêdayeyê Rayber Apoyî bêro vîrardene. Hem şorişê Rojavayê Kurdîstanî de hem zî têkoşînê 4 parçeyanê Kurdîstanî de gandar bimano. Ma heme şarê xo dawet kenê ke bi hewayêko tewr girseyî beşdarê merasîmê cenazeyî bibê.”
