Mûş de adirê Newroze bi waştişê azadîya fîzîkîya Rayberê Şarê Kurdî Abdullah Ocalanî ame geşkerdene. Hemserekê Pêroyî yê DBP’yî Keskîn Bayindirî xîtabê şarî kerd û vat: “Eke nîyeta şima aştî bo, rayîrê ci dîyar o. Dişmenîya vera kurdan biqedênê, wa Rayber Ocalan azad bibo.”
Mûş de bi sloganê “Azadî û Yewîya Demokratîke” Warê Garê Trênî de Newroze ameye pîrozkerdene. Qado ke bi alayanê rengînan xemilanayebi, bi ameyîşê şarê bi cilanê neteweyîyan pirr bi. Parlamentera Mûşî ya DEM Partî Sumeyye Boz, Hemserekê Pêroyî yê DBP’yî Keskîn Bayindir û zaf welatîyî beşdar bîyî.
Ciwanan û cinîyan bi nîşaneyanê serkewtiş û bi renganê kesk, sûr û zerdî Newroze bi coşêko gird pîroz kerd. Sloganê “Bijî berxwedana Rojava”, “Yek e yek e gelê Kurd yek e” û “Jin jiyan azadî” tewr zêde ameyê vatene.
‘Ma do teqez serkewê’
Hemsereka Mûşî ya DEM Partî Çîçek Tutuş vat ke adiro ke Mazlum Doganî bi hîrê çopanê kibrîtî wekerd tarîtîye roşn kerd û Newroza Abdullah Ocalanî pîroz kerd. Hemserek Îlyas Aslanî zî vat: “Na Newroze mîladêk a. Wa biba wesîleyê aştî. Şarê kurdî bi hêz o, ma do teqez serkewê.”
‘Azadîya şarê kurdî girêdayeyê azadîya Rayberê ci ya’
Parlamentera Mûşî ya DEM Partrî Sumeyye Boz qisey kerd û wina vat: “Na Newroze Newrozêka cîya ya. Azadîya şarê kurdî girêdayeyê azadîya Rayberê Şarê Kurdî ya. Awankerdişê komelê demokratîkî do bi têkoşînê cinîyan û ciwanan bêro pê. Têkoşîno ke cinîyê tede nêbê nêşêno serkewte bibo. Gimgim tena nîyo, ma do ci teslîmê kapîtalîzmî nêkerê. Ma do seba azadîya şaran, azadîya xoza û azadîya cinîyan têkoşînê xo bidomnê.”
‘Eke nîyetê şima aştî bo rayîr dîyar o’
Hemserekê Peroyî yê DBP’yî Keskîn Bayindirî zî wina vat: “Newroza 2026î azadbîyayîşê Rayber Ocalanî û şarê kurdî yo. Eke ma ewro eşkenê na Newroze pîroz bikerê bi saya têkoşînî yo ke aemyo dayene. Vizêr girewteyêko sîyasî hepisxane de cuya xo ra bî. Wexto ke Devlet Bahçelîyî vatêne ‘şima nêeşkenê kurd û tirkan yewbînan ra cîya bikerê’, embazê ma yo girewte cuya xo ra bi. Eke nîyetê şima waûbirayê û aştî bo rayîr dîyar o. Dişmenîya vera kurdan biqedênê, wa Rayber Ocalan azad bibo. Azadîya Rayber Ocalanî azadîya şarê kurdî ya. Wa rind bizanê ke şarê kurdî vera zaliman serê xo nêtewna û nêtewno zî.”
Qiseykerdişan ra dima Dayîkanê Aştî, sîyasetmedar û şarî adirê Newroze wekerd Pîrozkerdiş bi deyîranê deyîrbaz Denîz Esmerî dewam kerd û bi govendan temam bi.
