Hemsereka Pêroyî ya ÎHD’yî Eren Keskîn derheqê mesajê Îmrali de qisey kerd û va ke nê prosesî rê ganî hemê rêxistin, sendîka, oda û partîyê sîyasî wayîr vejîyê.
‘Ma binpaykerdişê heqan reyde pîl bîyî’
Keskîn va ke ê sey pawitoxê heqê merdiman heta nika hertim behsê çareserkerdişê aştîyaneyî yê meseleya Kurdan kenê. Aye va: “Komeleya heqê merdiman serrê 1990î de binpaykerdişê heqan ê Kurdistanî, vîndîkerdişê binê çiman de û veşnayîşê dewan ra nêzdî ra şahid bîya. Na sazîya heqê merdiman nê binpaykerdişê heqan kerdî rapor.”
‘Pereyê çeteyan aborîya Tirkîya xirab kerde’
Aye qiseykerdişê xo de rolê sinifa karkeran ser o zî vindert û va: “Verê her çî ganî Tirkîya de sinifa karkeran wayîrê nê prosesi bivejîya. Seba ke eke hende vêşanîye û feqîrîye est a, sebebê ci no şer o. Pereyê ke şer de yenê xerckerdene, bi taybetî wexto peyên de ardimê çeteyanê cîhadîstan aborîya Tirkîya xirab kerde.”
‘Na rey prosesî bipawê’
Keskîn ard ziwan ke meseleyê Kurdan çar dewletan eleqedar keno û no mesele raştîya Kurdistanî yo. Aye va: “Ma bi serran o vanê. Vurîyayîşê Sûrîye û Rojavayî nê meseleyî ser o tesîr kenê. No sîyasetê sivîlî, sendîka û rêxistinanê demokratîkan ver berpirsîyarîyêko pîl o. Ganî ma na rey nê prosesî texrîb nêkerê. Çunke erdnîgarîya ma zaf muhtacê aştî ya. Peynî de ma pêro dejî ancenê. Seba naye ganî her kes bi vengêko berz aştî biwazo û prosesî bipawo.”
