Keyeyanê tepişteyan ajansa JINNEWS’ê rê qisey kerd û bale antî rewşa weşîya tepişteyê nêweşî Rihan Kavak Ozbek û Selver Yildirim ser o û vatî: “Bi tehrîkan hêrişê rûmetê tepişteyan kenê û tedawîya înan bi nê rengî asteng kenê. Heqê tepişteyan ê cuye gênê û ê mergî reyde rî bi rî yê.”
Keyeyê 2 tepişteyanê nêweşan yê Selver Yildirim û Rihan Kavak Ozbek de ke Zîndanê Cinîyan ê Sîncanî de manenê ke binpaykerdişê heqan ê tewr giran yeno kerdiş , venga selahîyetdaran da.
‘Semedê cuye têkoşîn kenê’
Tepişteya nêweşa girane Selver Yildirim ke serra 1999. de ameye tepiştiş û cezaya muebetî aye rê ameye birnayîş, zîndan de problemanê giranan yê weşîye reyde têkoşînê cuye dana. Selver Yildirim wexto ke teber de bîye, çimê aye rastî kor bî û semedo ke kewte zîndan û dermankerdişê çimê xo yê çepî zî nêkerd, çimê aye se ra 10 kêm vîneno. Nê semedî ra zî bi tena sereyê xo nêeşkena lazimîyê xo yê bingeyînî bîyara ca. Pêwa ke mîyanê 25 serranê peyîn xeylêk zîndanê ke aye semedê dermankerdişî sewqî bîya zî semedo ke nêweşîya aye resaya sewîyeyêka giran, aseno ke heta nika averşîyayîşêk nêbîyo.
‘Nêeşkena bi tena sereyê xo cuya rojane dewam bikero’
Waya Selvere derheqê rewşa weşîya waya xo de wina vat: “Semedê problemê weşîye mecbûr mende ke semedê dermankerdişî şêra xeylêk zîndanan. La waya mi semedê sebebêko cîya nêameye dermankerdiş. Nê 25 serran de ameye a sewîya ke çimê aye temamî kor bibê. Nika çimêke aye kor bîyo û semedê dermankerdişêk baş nêbî, çimê aye ke vîneno zî wareyê vînayîşî de kêmî bîyo. Nê semedî ra waya mi nêeşkena lazimîyanê xo bi tena sereyê xo bîyara ca. Bê hetkarîya embazanê xo nêeşkena cuya xo ya rojane dewam biker.”
Vengdayîşê veradayîşî
Rojda Yildirim, dîyar kerd ke ganî Selver Yildirim semedê problemê cidî yê weşîye, zîndan de nêmano û vat: “Ma eynî vengdayîşî tena semedê waya xo nêkenê, semedê pêro tepişteyanê nêweşan kenê. Waştişê ma o yo ke nê wareyî de bi lez amadekarîyî bêrêkerdiş, tepişteyê nêweşî bêrê veradayîş û şert û mercê dermankerdişî bêrê peydakerdiş.”
Warkênaya tepişteya nêweşe Rihan Kavak Ozbek ke Zîndanê Girewte yê Cinîyan ê Sîncanî de manena Tuba Demîr, bale ant problemê weşîye yê yayka xo ser û bale ant binpaykerdişê heqan ser. Tuba Demîre venga selahîyetdaran kerd ke vengê înan bieşnawê û waştişê înan bica bîyarê.
‘Doktor waşt ke bi kelepçe muayeneye bikero’
Tûba Demîr, ard ziwan ke yayka aye 3ê Adara 2016î ra tepişte ya û xeylêk problemê weşîye reyde rî bi rî menda û vat: “Yayka min a ke vernîya prosesê zîndanî de hende nêweşî aye de çinî bî, nika semedê şert û mercê zîndanî bi xeylêk nêweşîyan reyde têkoşîn kena. 11ê teşrîna verêne de aye wedarnayî Nêweşxaneyê Bajarî Etlîkî yê Enqerayî, semedê netîceya testê ke vernîya kolonoskopî amebî kerdiş û kolonoskopîyê aye bêro antiş, yayka mi zî doktorî ra waşto ke kelepçeyê aye bêrê akerdiş la doktorî vato, akerdişê kelepçeyî hewce nêkeno. Hemverê na rewşe de yayka mi dîyar kerd ke na rewşe goreyê rûmetê merdiman nîya û vernîya ke agahîyêke netîceya testî ra bigîro odaya xo ra vejîyaya.”
