Bi paketa hukmî ya 11. bi hezaran girewteyê edlî ameyê veradayene. Girewte Okay Gur senî ke ame veradayene, qezaya Sûrî ya Amedî de Rojda Yakişikli kişt. La heto bîn ra girewteyê sîyasî rixmo ke cezayê înan qedîyenê zî bi manayê “poşman nêbîyo” nêyenê veradayene.
Girewteyê edlî bi paketanê hukmî serbest veradîyenê. Serdemê AKP’yî de 11 paketê hukmî meclîs de ameyê qebulkerdene. Bi nê paketanê hukmmî tewr zaf girewteyê edlî yê kiştox û ê ke tîryakî ancena serbest veradîyenê.
La girewteyê sîyasî û nêweşî nêyenê veradayene. Hepisxaneyanê Tirkîya û vakurê Kurdîstanî de bi seyan girewteyê nêweş ê sîyasî est ê. Rixmo ke nêweşîyê înan zehmet ê zî nêyenê veradayene. Reyna xeylê girewteyî rixmo ke cezaya xo ya 30 serrî temam kerda zî riyê qeraranê Komîteyanê Çimdarî û Îdare ê hepisxaneyan ra nêyenê veradayene.
Girewteyê sîyasî rixmo ke cezaya înan qedîyena zî nêyenê veradayene
Nê girewteyan ra yew zî Serdar Şitiliay o ke 2 serrî û 7 aşmî cezaya ey a ameye taloqkerdene û nêyeno veradayene. Reyna girewteyo bi nameyê H. Hasan Durak, Hepisxaneyê Tîpê S’yî yê Samsunî de yeno girewtene û tehlîyeya ey seba 15 aşman ameya taloqkerdene.
Girewteyo sîyasî Ayhan Bayar zafêrê 30 serrî yo girewte yo. Rixmo ke cezaya ke ey rê ameya dayene, qedîyaya zî, nêyeno veradayene. Komîteyê Çimdarîye yê Rayberîya Hepisxaneyê Ewleyîya Berz ê Erzinganî bi manayanê “Poşman nêbîyo” , “Rewşa ey goreyê teberî baş nîya” û “Aşma êlule de rojêk cezaya hucreyî dabî” veradayîşê Abdulmecît Yuksekbagî reya 5. seba 6 aşman taloq kerd.
Girewteyê edlî hepisxane ra vejîyenê û cinîyan qetil kenê!
24ê kanûna 2025î de Paketa Hukmî ya 11. ke girewteyê sîyasî tede ca gênê, bi vengdanê AKP û MHP’yî ameye qebulkerdene. Do bi des hezar girewteyî ke beşdarê sucanê kiştiş, tecawiz û tîryakî bîyê serbest veradîyê. Nika ra tehlukeyê veradayîşê girewteyanê edlî komelî de xo mojna.
Okay Gur ke bi Paketa Hukmî ya 11. Amed de ame veradayene, 27ê kanûne de qezaya Sûrî ya Amedî de Rojda Yakışikli kişt.
Salîh Aybas ke 2 serrî ra ver Nermîn Tîrît birindar kerdbî û amebi girewtene, dima ke bi destûr hepisxane ra vejîya, Nermîn Tîrît ke verê birîndar kerdbî, na reye kişt.
10ê teşrîna peyêne ya 2025î de qezaya Gebze ya Kocaelî de Yakup Sogutçu ke tîryakî ra amebi girewtene, dima ke bi destûrî ame veredayene, cinîya xo Esma Sogutçu kişt.
Nê nimûneyê ke cor de yî mojnenê ke girewteyê edlî riyê seba sucanê ke kerdê, ameyê girewtene, demo ke yenê veradayene reyna sucê kiştişî domnenê.
