Koordînasyonê KJK’yî vat heta muhakemekerdişê qetilkaran ganî têkoşîn bêro xurtkerdene û semedê tewrbîyayîşê çalakîyanê qirkerdişanê Parîsî veng da ke do 23ê Kanûne ra heta 11ê çeleyî bêrê kerdene.
Goreyê xebera ANF’yî Koordînasyonê KJK’yî bi wesîleya serrgêra dîyine ya Qirkerdişê Parîsî yê Dîyinî beyanatêk daye û nê vatî:
“23ê Kanûna 2022yî de paytextê Fransa Parîs de dewleta Tirke ya faşîste hêrişê Merkezê Kulturê Kurdan û kargehanê Kurdan kerd. Hêrîşî de Evîn Goyî (Emîne Kara), Mîr Perwer û Abdurrahman Kizil şehîd bîyî. Ma serrgêra şehadetê înan de hîrê welatperweran zî bi hûrmet, minet û heskerdişî yad kenê. Ma soz danê ke amancê înan ê cuya bi rûmet û azad bîyarê ca.
Hemra Evîne bi tradîsyonê xoverdayîşê Botanî pîl bîye û seba ke nê tradîsyonî biresno her hetê Kurdîstanî û cinîyanê Kurdan têkoşîno xurt kerd. Aye 34 serrî têkoşîn kerd û seba ke felsefeya cuya azade ya Raybertîye biresno cinîyan keda pîle daye. Hemra Evîne partîbîyayîşê cinîyan ra heta xopawitişî û înşakerdişê sîstemê xo yê demokratîkî heme xebetan de aktîf ca girewt û qîrayîşê cuya azade ya cinîyanê Kurdan kirişt dinya.
Welatperwerê ma yo erjîyaye Mîr Perwerî zî vera qirkerdişê kulturî yê dişmenî Ewropa de mîyanê xebatanê kulturî de ca girewt û semedê pawitişê ziwan û kulturê Kurdan vera qirkerdişî têkoşîn kerd. Welatperwerê ma yo kedkar Abdurrahman Kizilî zî Ewropa de mîyanê têkoşînî de ca girewt û kultur û erjê xo pawitî.
Dewleta Tirke semedê qirkerdişê Kurdan heme metodanê leyminan şuxulnena. Bi taybetî cinîyanê şorişgêran hedef gêna. Tewr peyêne 18ê kanûne de hêrişanê vera Rojawanî de rojnamegerî Cihan Bîlgîn û Nazim Daştan şehîd bîyî. Ma şexsê nê wird kedkaranê çapemenîye de heme şehîdanê çapemenîye bi heskerdiş û minetî yad kenê.
Dewleta tirke ya faşîste Ewropa û Kurdîstan de Kurdan qir kena la çew vengê xo nêvejeno. Bêvengîya vera nê qirkerdişan hêz dano dewleta Tirke û çeteyanê ci. Rixmo ke eşkera yeno zanayene ke qirkerdişê Parîsî bi destê MÎT’î ame kerdene hukmatê Fransa semedê muhakemekerdişê dewleta tirke çîyêk nêkeno. No zî hêz dano awanîya çeteyan û verê hêrişanê Ewropa zî akeno. MÎT û dewleta Tirke Kurdîstan û her ca de sûcanê şerî kenê. Dewleta tirke ewro Rojawan de sey DAIŞ’î hêrişê şarî kena û sîvîlan qetil kena.
Ganî heme ciwan û cinîye sere de Evîn Goyî semedê şehîdan şorişê azadîye û şorişê cinîyan bipawê û têkoşînî hîna xurt bikerê. Na çarçewa de heta muhakemekerdişê qetilkaran ganî têkoşîn bêro xurtkerdene. Ma veng danê ke wa her kes tewrê çalakîyanê Qirkerdişê Parîsî bibo ke do 23ê kanûne ra heta 11ê çeleyî bêrê kerdene. Reyna ganî şarê ma hîna zaf paştî bido şar û şorişê Rojawanî.”
