Endamê DEM Partî yê Komîsyonê ‘Demokrasî, Wayûbirayî û Paştdayina Neteweyî’ Celal Firat dîyar kerd ke komîsyon do hewteyo ameyox de, Dayîkê Şemeyî û Dayîkê Aştîye dawetê Meclîsî bikero û xeylî rêxistinanê komelkî goştarî bikero. Celal Firat destnîşan kerd ke seba ke aştî aver şîra wa medyaya ke nêzdîya CHP’î ya û hawizî wa ziwano leşîn ra fek verado.
Komîsyonê ‘Demokrasî, Wayûbirayî û Paştdayina Neteweyî’ roja 12ê Tebaxe kombîyayîşê xo yê hîrêyine pê ard. Labelê nê kombîyayîş de çîyo ke wazîyeno nêbi. Komîsyon do hefteyo ameyox de sazîyanê komelkî û rêxistinanê demokratîkan zî goşdarî bikero.
Derheqê plansazîya ke ameya viraştene de Endamê DEM Partî yê Komîsyonî Celal Firat ercnayîş kerd. Celal Firatî ard ziwan ke o beşdarê kombîyayîşê hîrêyîne biyo û wina va: “No kombîyayîş de zêdêrî propaganda vejîya ver. Lazim bi ke no kombîyayîş bîyêne kombîyayîşo ke serê metotê xebate û rêxistinanê xebate de nîqaşan bikerî. Labelê CHP’î pêşnîyaznameya ke 29 xalan ra ameya pê da. Reyna partîyên bînî yên sîyasî qiseykerdişê cîyayî kerdî. Labelê ma waşt ke no komîsyon bi lez û raşt hereket bikero. Ma waşt ke babetê ke bêrî nîqaşkerdiş û kesê ke înan reyde pêvînayîş bêrî kerdiş bi lez bêrî dîyarkerdiş û plankerdîş. Armancê ma yê esasî azadîya heqan o. Heq û hiqûq o. Averberdişê demokrasî û aşîtîya komelkî yo.”
Do Dayîkê Şemeyî dawetê Meclîsî bikerê
Celal Firatî wina qisey kerd: “Komîsyonî do hewteyo ameyox de Dayîkê Şemeyî, Dayîkê Aştîye û temsîlkarê rêxistinanê demokratîkan reyde pêvînayîşan bikero. Kesê ke înan dawet bikerî meclîsî nameyê înan dîyar bîyî. Ganî ma nê pêvînayîşan hîra bikerî. Hefteyo ameyox de ma do lîsteyêka hîra ya rêxistinanê komelkî pêşkêşê meclîsî bikerî. Ma wazenî bi kesên ke 50 serrî ra zêdêr mexdûr bîyî, dewanê înan ameyî vêşnayîş û vilakerdiş, Dayîkê Şemeyî, Dayîkê Aştîye reyde pêvînayîşan bikerî. Ma do waştişê înan goşdarî bikerî. Reyna ma do bi rayîrberîyê pawitoxanê heqanê merdiman û temsîlkaranê baroyanê ke herême de yê reyde pêvînayîşan bikerî û înan dawetê Meclîsî bikerî.”
Ziwanê medyaye lêşin o
Celal Firat bale ante ser ziwano ke vera prosesî de yeno şuxulnayene û wina dewam kerd: “Vera prosesi yew ziwanêko lêmin est o. Ma no ziwan bi her hawayî red kenî û anenî ziwan. Eke ma wazenî aşîtî aver berî, ganî verê her çîyî ziwanê xo raşt bikerî û ziwanê lêşin pak bikerî. Medyaya nêzdîya CHPyî de sey Sozcu TV, Halk TV ziwanêko lêşin bikar anenî. Ganî nê ziwanê lêşinî ra fek veradê ke aştî awan bo, demokrasî aver şiro.”
Ganî heqê hêvî bêro dayene
Celal Firatî qiseyê xo wina domna “Verê destpêkerdişê prosesî ra heta ewro bi sazîyanê komelkî û rêxistinanê demokratîkan reyde dîyalogê ma zêde yê. Dîyalogê ma dewam kenî. Ma bi yewbînan reyde xebat kenî. Kombîyayîşê şarî yenî viraştiş. Sazîyanê komelkî de xebatê ma est ê. Ma bawer kenî û hêvî kenî ke çarçeweya heqanê bingeyê û azadî de gamê bêrî eştîş. Serê xo de hepsîyê nêweşî û sîyasî bêrî veradayîş. Reyna seba ke gerîlayê ke çekî vêşnayî agêrî û beşdarê sîyasetî bibî ganî şert û mercê qanûnî bêrî awankerdene. Her platforman de partîya ma zî ana ziwan ke ganî şertanê Birêz Abdullah Ocalanî yê fîzîkî bêrî weşkerdiş û sozê ke seba nê yewî ra ameyî dayîş bêrî ca ardiş. Ganî serê xo de heqê hêvî bêro dayîş. Bieşkero bi sazîyanê komelkî û demokratîkan reyde pêvînayîşan bikero. Seba ke nê heqî bêrî pawitiş û aver şirî zî xebatê ma est ê. Ma hêvî û bawer kenî ke êdî do her kes bi ziwanê xo azad qisey bikero. Azad nasnameyê xo biciwo. Seba na yewî ra ganî samîmîyet esas bêro girewtiş. Ma do yewbînan reyde na samîmîyetî bivînî. Ewta de wezîfeya Serekê Meclîsî zî muhîm a. Çîyê ke o zî bikero est ê. Ganî hem kesî rê goşdarî bikero hem zî çareserî aver bero. Seba viraştişê çareserî çi rol û wezîfa ke keweno serê milanê ma, ma amade yî. Reyna berpirsîyarîya komeleyanê elewîyan zî zêde ya. Meseleya cemxaneyan û hemwelatîya seyyewbînan zî ganî bêro çareserkerdiş. Seba na yewî ra do xebatê ma zêde bibî.”
Çar Katrilyon Dolarî şer de xerç kerdî
Celal Firatî herî peynî bala xo muhîmîya maseyî ser ant û wina peynî kerd: “No maseyê ke ameyo awankerdene do Tirkîya rê îmkananê demokratîkbîyayîşî bido. Ganî îmkanan bido zî. Ma heme kesê ke serê nê masayî de yî eşkenî serê esasê seyyewbînanî, azadî û edaletî, verê demokratîkbîyayîşî û aşîtîya komelkî akerî. Hêvîyê aşîtîye yê komelî zêde yê. Tirkîya de nêzdîyê 4 Katrilyon Dolarî çimeyê ekonomî şer de ameyî xerckerdiş. No pere cêba şarî ra ameya xerckerdiş. Eke prosesê aştî aver şiro, na aborî do bibo bîngeyê aştîye. Ma do bi na gama xo, belaya enflasyonî ra zî xo bixelesnê. Ma her dem hetkarê aşîtî yê. Seba ke ma her dem bibî vengê aştî zî çi keweno serê milanê ma, ma do bikerî. Nê welatî de meseleya esasî meseleya kurdî ya. Ganî ziwanê kurdî zî bibo ziwanê perwerdeyî û heme astengîyê ke verê kurdî de yê bêrî wedaritiş. Seba nê yewî ra ganî qanûnî bêrî wedaritiş. Reyna seba heqê elewîyan zî do xebatî bêrî kerdiş. Seba nê yewî ra ganî ma dîyalog û empatî aver berî. Ganî ma dest polîtîkayanê înkarî ra veradayîşî bikerî. Ma zêdêr destê xo bidî yewbînanî. Ma îradeyê xo û şarê xo ra bawer kenî.”
