KNK’yî paştî daye projeyê ‘Yek e yek e yek e, gelê Kurd yek e’ ke Başûrê Kurdîstanî de ameya destpêkerdene û vat: “KNK bi nê çîyî sey wezîfeyê xo vîneno ke no qonaxo hesas de cehd bikero ke herême de konferansêko hîra organîze bikero.”
Kongreya Neteweyî ya Kurdîstanî (KNK) derheqê projeyê ‘Yek e yek e yek e, gelê Kurd yek e’ ke hetê grûbêka roşnvîranê Başûrê Kurdîstanî ra ameyo destpêkerdene, eşkerayî daye.
KNK’yî eşkerayîya xo de wina vat: “Ma sey KNK îlan kenê ke ronayîşê ma ra heta nika amancê KNK’yî heme parçeyanê Kurdîstanî û dîasporaya kurdan ê heme dinya de pêameyîşêko neteweyî û yewbîyayîş temîn bikerê. No seba amancê şehîd û kedkaranê şarê ma û seba azadîya Kurdîstanî yo. Nê amancî reyde 27 serrî yo xeta neteweyî ser o warê sîyasî, dîplomatîk, komelkî û kulturî de ma xebatî ramitê. Na çarçewe de bi seyan konferansê herêmkî, Kurdîstanî û nêteweyî awan kerdî.
Serkewtişê şarê kurdan girêdayeyê yewbîyayîşê ma yo
Hêrişanê Rojavayê Kurdîstanî ser o de ma dî ke yewbîyayîşê kurdan ê sewîyeya herêmkî û nêteweyî yewbîyayîşê şarê ma û merkezê qerardayîşê dinya ser o çiqas tesîrdar o. Eynî tewir îttîfaqê mîyanê hêzanê Rojhelatê Kurdîstanî hîsê neteweyî tena Rojhelatê Kurdîstanî de ney, heme Kurdîstanî de senî xurt kerd, ma dî. Coka serkewtişê şarê kurdan û caardişê heqanê ci, kombîyayîşê sîyasî û stratejîkî de yewbîyayîşê ma rê girêdaye yo.
Wa bibo bingeyê konferansê neteweyî
Ma naye sey têkoşîn, presnsîbê xo û amancê xo yê bingeyînî vînenê. Eynî wext de ma muhîm û hewce vînenê ke no bibo bingeyê konferansêka neteweyî ya hempare ya seba heme Kurdîstanî û dîaspora, bi beşdarîya heme partî, rêxistine û kesayetanê neteweyîyan. Ganî na konferanse stratejîyêka neteweyî ya hempare awan bikero û xerîtaya rayîrê têkoşînê azadîye dîyar bikero. Ma sey KNKyî sey timûtim nê prosesê hassas û kompleksî de seba awankerdişê konferansêka hîraye cehd kenê.”
