KNK’yî dîyar kerd ke şarê kurdî terefgirê şerê Îran-Îsraîlî nîyo, ê wazenê ke mesele bi rayîrê dîyalog û aştî bêra çareserkerdene û vat: “Nê prosesî de ke xerîtaya herême beno ke bivurîya yewîya kurdan heyatî ya.”
Konseya Rayberdişî ya KNK’yî derheqê şerê mabênê Îran û Îsraîlî de eşkerayîyêk daye.
KNK’yî da zanayene ke şerê Îran û Îsraîlî şerêko newe nîyo û vat: “Des serran ra nata mabênê Îran û Îsraîlî de nakokî û şerî est ê. Amerîka zî nika tewrê şerî bîye. Mesele hinî bîya meseleyêka mîyanneteweyî û globale.
Şarê kurdî terefgirê nê şerî nîyo. Her çiqas ma teref nêbê zî no şer ma nêzdî ra eleqedar keno û bi giranî tesîrê şar û welatê ma keno. Rojhelatê Kurdîstanî de baregehê leşkerî yê Îranî yenê hedefkerdene û nê hêrişan de şarê ma zerar vîneno. Ma sey kurdan wazenê ke meseleyî bi dîyalogan û aştî öareser bibê. No şer ma ra nêvejîya zî ma mîyanê nê şerî de mendî.
No şer do netîceyanê pîlan xo de bîyaro. Statukoyê Sykes-Picot û Lozanî herême de bin keweno. Netîceya nê şerî de xerîtaya herême beno ke bi temamî bivurîya. Nê prosesî de yewîya zereyê keyeyê kurdan heyatî ya. Sere de hêzê Rojhelatê Kurdîstanî, pêro hêzê Kurdîstanî ganî têbigêrê û yewîya xo xurtêr bikerê.
Ma sey KNK seba yewîya kurdan tim têgêrenê û ma do nê têgêrayîşî xurtêr bikerê. Ma mîyanê partî û rêxistinanê Rojhelatê Kurdîstanî de seba awankerdişê platformêkê hemparî xebitîyenê. Nê warî de ma do xebatanê xo bizêdînê, partîyan û rêxistinan de ronişê û mîyanê partî û rêxistinanê Rojhelatê Kurdîstanî de hemsengîye virazê.
Bi na wesîle sere de hêzê Rojhelatê Kurdîstanî ma venga pêro hêz, partî, rêxistin û dezgehanê Kurdîstanî danê ke hetkarîya xebatanê ma yê yewîye bikerê û seba stratejîyêka hempare cade têbigêrê.
Ma venga Îran, Îsraîl û Amerîka zî danê ke cade şerî vindarnê û masaya dîyalogî de bêrê têhet û bi aştî meseleyanê xo çareser bikerê.”
