Rîyê dormegirewtişê çeteyanê DAÎŞ, HTŞ û dewleta tirkan ê vera Kobanê ra şar nêşêno hewcedarîyanê xo yê bingeyinan peyda bikero. Wer, derman, sotemenî û mamayê domanan vera-vera qedîyenê.
Seba dormegirewtiş û hêrişanê hovaneyan ê çeteyanê DAÎŞ, HTŞ û dewleta tirkan ke vera Kobanê dewam kenê, heme şaristanî de problemanê cidîyan ê resayîşê hewcedarîyanê însanîyan dest pêkerd. Birîyayîşê elektrîkî, awe û înternetî ke vizêrî dest pêkerd dewam keno, şar nêeşkeno hewcedarîyanê xo yê rojaneyan peyda bikero.
Hêzê YPJ-YPG û QSD’yî hêrişê çeteyan ke herêmanê dewanê Kobanê ser o yenê kerdene, bi cewabê pêtî peyser erzenê.
Herêma Hemdaşê ya rojawanê şaristanî ke hêrişî uca de gird ê û dewanê Quba, Ceada, Hemdor, Xan Memdid, Çelabiyê û qezaya Sirînî de rewşa însanîye roje bi roje xerabêr bena.
Aktîvîstê ke herême ra melumatan pare kenê, hişyarî da ke eke dormegirewtiş dewam bikero talûkeyo ke cuya bi hezaran sîvîlan tehdît keno, zêde beno û venga komelê mîyanneteweyî û sazgehê hetkarîyanê însanî da ke seba vindarişê hêrişan û piştîdayîşê şarê Kobanê wa lez mudaxele bikerê.
Şarê Kobanê vera pêroyê zehmetan îfade keno ke xoverdayîşê xo dewam keno û destûr nêdano ke çeteyî bikewê şaristan. Komîte û komunê Îdareyê Xoserî yê Demokratîkî yê Kobanê goreyê îmkanan ke destê înan de yo, seba peydakerdişê hewcedarîyanê şarî xebatanê xo dewam kenê.
