Endamê Heyetê Îdareyî yê Odaya Tebîban a Amedî Mihemed Çanî vat ke rewşa Kobanê bîya krîzê weşîya şarî û heqê weşîye nêyeno taloqkerdene û bazarîkerdene.
Kobanê de çiqas ke qerarê agirbestîye est bibo zî, ablûka dewam kena û şar hetê weşîye û hewcedarîyanê bingeyîyan ra tengîye de yo. Resayîşê dermanan û hacetanê tibîyan zehmet bîyo û doktorî vanê ke heta nêeşkenê şirîngayêk zî peyda bikerê. Muracatê ke TTB û SES’î Wezaretê Weşîye rê kerdî, bênetîce mendî.
Mihemed Çanî vat: “No meselayê şeref û wîjdanê merdimîye yo. Gedeyê ke adirê înan est o nêeşkenê biresê dermanan, nêweşê dîyalîzî nêeşkenê biresê tedawîye. Seba ma no felaketê merdimîye yo. Nêakerdişê Berê Mirşîtpinarî, rasterast netîce dano.” Çanî ard ziwan ke korîdorê cuye akerdene waştişêk nîyo, mecbûrîyet o û dermanî zî hetkarî nîyê, mecbûrîyet o.
Çanî sewbîna vat ke na rewşe eşkera kena ke qiseyê sûcanê şerî yeno kerdene û dewletê ke bêveng manenê, berpirsîyar ê. Çanî vat: “Kurdî gedeyê êtîmî yê na dinya nîyê, şarêk ê û têkoşînê xo kenê.” Goreyê melûmatan ke Kobanê ra yenê, hewcedarîyê tewr bingeyinî yê acîlî nêeşkenê bêrê temamkerdene. Resayîşê şirîngayan, dermanê adirî û kîtê dîyalîzî zaf sinordar bîyê û emelîyatê acîlî zî zaf kêmî eşkenê bêrê kerdene.
