Koçberanê Efrînî dîyar kerd ke badê vejîyayîşê mecbûrî yê Efrînî nê çend serrî yo mîyanê koçberî de yê û wazenê ke bi hewayêk ewle agêrê serê erdê xo.
Koçberan netîceyê dagirkerîya dewleta Tirkîya û hêrişê grûbanê gîrêdayê aye, neçar mendî erdê xo terk kerdê goreyê peymana 29ê çele paweyê agêrayîşê Efrînî yê. Koçberê ke dibistanê Kantonê Cizîre de ca bîyê, seba agêrê ca û warê xo ewnîyayîşê xo bi ajansê ANHA’yî rê pare kerdî.
‘Ma wazenê agêrê serê herre xo’
Fatme Sîdo dîyar kerd ke yê wazenê ke bi selametî agerê ca û warê xo wina vat: “Ma wazenê bi hêzê xo reyde agêrê serê herre xo, no çend serrî yo ma dûrîyê waranê xo yê.”
‘Ganî ma bi hêzê xo reyde agêrê’
Emîne Hemze zî da zanayene ke yê wazenê ke agêrê la tersê înan rayîrî û wextêko biresê warê xo û ewleyî nêvînê est o. Emîne Hemze wina vat: “No bî 8 serrî ma koçberê endî rewşa ma xirabtir bena ma wazenê agêrê warê xo.”
‘Ganî asayîş bêro garantîkerdene’
Şikrî Mistefayî zî dîyar kerd ke badê vejîyayîşê Efrînî heta nika cayêk ra ver bi cayêko bîn koçber benê û wina ard ziwan: “Gedeyê ma bê wendene mendî, ma neçar mendî ca û warê xo ra vejîya yê. Ma wazenê agêrayîşê ma bi kêfweşî û sereberzî bo, ganî asayîşê şarê ma bêro garantîkerdene.”
