Koma Agirê Jiyan ke do badê 23 serran Newroza Amed de vejîyo sahne, venga şarê kurdan da û vat, “Bêrê ma bi ruhê Newroza azadîye deyîranê xo vajê”.
Koma Agirê Jiyan ke do badê 23 serran Newroza Amed de vejîyo sahne, venga şarê kurdan da. Endamê komî Elî Geçîmlî, Şener Yildiz û Merale Tekçî merkezê Kultur û Hunerî yê Dicleyî de Ajansa Welatî reyde qisey kerd.
Koma Agirê Jiyan serra 1992î de Merkezê Kulturî yê Mezopotamya (NÇM) yê Îstanbulî de bi hîrê endaman ameye viraştene. Heta nika çar albumê bi nameyê “Adarê”, “Hêlîn”, “Dê Were” û “Aştî” vejîyayê. Neslê serranê 90an bi veng û awazê înan girs bîyê. Badê ke endamî cîya bîyê, nika fina ameyê pîya û do 21ê adare de sahneya Newroza Amed de deyîranê xo vajê.
Kome vat: “Serranê 90an de ma tena huner nêkerdêne, ma mesaj zî dayêne. Rolêkê ma yo sîyasî zî est bî. Ê serran de polîsan ameyêne mîkrofon girewtêne, konserê ma nêmcet verdayêne û ma destbend kerdêne. La ma pê naye zî dewam kerd.”
Kome vat: “Ewro ma vînenê ke ciwanê ma hîna kêmî kurdkî qisey kenê. Sîyasîbîyayîşê deyîran nêmendo. Coka ma vat ke ma do sahne nêverdê hunermendê populîstî rê. Ma do newe ra sey Koma Amedî, Koma Agirê Jiyanî, Koma Çîya bi vindertişê xo, fikrê xo û deyîranê neweyan newe ra ciwanan rê nîşan bidê.”
Kome vat: “Emser seba kurdan zaf muhîm o. Rojava de, Rojhelat de şarê ma zaf çîyî dîyî. Ma zî Vakur de yê. Ma bêrê têhet û pîya bibê yew. Bi ziwanê xo, zazakî, soranî, goranî, kurmancî deyrîanê xo vajê. Ma wazenê ke dormeyê adirê Newroze de bêrê têhet û govenda xo pîya bigîrê. Bêrê ma bi ruhê Newroza azadîye deyîranê xo vajê!”
