Koma Berxwedan a ke tarîxê hunerê şorişgerî de wayîrê mîsyonêko stratejîk a, mabênêko derg ra pey xo sey “Akademî û Dibistanê Kulturî” newe ra awan kerd.
Koma Berxwedan a ke serra 1983î de bi perspektîfê Rayberê Şarê Kurdî Abdullah Ocalanî ameybî ronayene û serra 2019î de qerarê xofesihkerdişî dabi, şaristanê Kolnî yê Almanya de bi resepsîyonêko biheybet newe ra ronayîşê xo îlankerd.
Perspektîfê ‘Awankerdişê kulturî’
Kome deklerasyonê xo yê ronayîşî de dîyar kerd ke ê do demo newe de tena bi berardişê muzîkî sînorkerde nêmanê û xo sey “Akademî û Dibistanê Kulturî” bi name kerd. No qeraro newe hetê kome ra sey rol û mîsyonê awankerdişê “Prosesê Aştî û Komelo Demokratîk” de sey hewcedarîyêk ame dîyar kerdene. Kome eşkera kerd ke ê do nê prosesî de wezîfeyê “awankerdişê kulturî” bigîrê serê milê xo.
Xemgîn: Koma Berxwedan wijdanê neteweyî yo
Nameyê kome ser o hunermendo namdar Hozan Xelîl xemgîn qisey kerd û bale ante kokê kome ser o û wina vat: “Koma Berxwedan projeyê Rayber Apoyî bi xo bi. No proje serra 1986î de ravurîya veng û wijdanê neteweyî yê Kurdîstanî. Rixmê heme hêrişan serê sazgehanê ma de, ma 33 serrî xover da. Nika ma nê mîrasî ravurnenê dibistanêk ke heta ke kulturê ma vera asîmîlasyonî bibo mertal.”
Sazgehan ra mesajê paştîdayîşî
Resepsîyon de hunermendê sey Hozan Şemdîn, Kawa, Amele, Gulîstan Musa, Şîyar Munzur, Hozan Aydin, Jiyan Osman û Bengî Agirî amade bîyê. Sewbîna zî sazgehê sey TEV-ÇAND, Hunerê Mizgîn, Heyva Sor, YEKMAL û KOMAW zî bi amacê paştîdayîşî tewrê resepsîyonî bîyê. KONGRA GEL mesajêk erşawit û bi nê vatişan bawerîya xo îfade kerd: “Koma Berxwedan awankerdişê cuya newe de do bibo pêşeng.” KNK’yî zî dîyar kerd ke xonewekerdişê Koma Berxwedan cewabêko tarîxî yê seba ruhê zemanî yo. KCK-E’yî zî vat ke hunermendî mîmarê awankerdişê komelê demokratîk ê û destekê xo seba kome eşkera kerd.
Resepsîyon badê munaqeşe û erjnayîşê plananê neweyan bi deyîranê şorişgerî yê ke bi desan serran mîyanê şarî de yenê vatene qedîya.
