Grûba Xebate Ya Vateyî reya 39. Amed de bi 24 endamanê xo kom bîyê.
Grûba Xebate Ya Vateyî ke serra 1996î ra heta ewro xebatanê xo yê lehçeya kirmanckî ser o kena, ewro reya 39. kom bîye. Grûba Xebate Ya Vateyî ewro Amed de Green Park Otel de kombîyayîşê xo yê 39. da dest pêkerdene. Do bi 24 endamanê xo 4 rojî kombîyayîşê xo bidomno.
Grûba Xebate Ya Vateyî
Grûba Xebate Ya Vateyî serra 1996î de çend kirmancê ke bi kirmanckî (zazakî) nusenê û mintiqayanê cîya-cîyayan ra yê, paytextê Swêdî Stockholm de bi nameyê Grûba Xebate ya Vateyî yew grûbe ware arde (teşkîl kerde). Na grûbe serra 1997î de kovara Vateyî weşanaye û na kovare heta nika 75 hûmarî vejîyaye. Grûbe 1996î ra heta 2024î Ewropa û welat de 38 kombîyayîşî kerdî. Nê kombîyayîşan de qaydeyê rastnuştişî tesbît bîy û seba standardîzekerdişê nuştişê kirmanckî xebate bîye. Na xebate de, çekuyê ke ziwanê rojaneyî de tewr zêde ênê xebitnayene amey standardîzekerdene. 10.000î ra zafêr çekuyê bingeyênî û 60.000 varyantê înan amey etudkerdene û seba ziwanê nuştekî formê çekuyan yê standardî amey weçînitene. Nê çekuyê standardî û varyantê înan, di ferhengan de kom bîy. Her di ferhengî hetanî ewro panc rey çap bîyê.
- Ferhengê Kirmanckî (Zazakî)-Tirkî, Çapa 5., Weşanxaneyê Vateyî, Îstanbul, 2016
- Türkçe-Kırmancca (Zazaca) Sözlük, Çapa 5., Weşanxaneyê Vateyî, Îstanbul, 2019
Rayberê rastnuştişî zî hîrê rey çap bî:
- Rastnuştişê Kirmanckî (Zazakî), Çapa 2., Weşanxaneyê Vateyî, Îstanbul, 2012
- Rastnuştişê Kirmanckî (Zazakî), Çapa 3., Weşanxaneyê Vateyî, Îstanbul, 2023
Roja awanbîyayîşî Grûba Xebate Ya Vateyî ra (tebaxa 1996 ra) heta aşma nîsana 2023î, 56 kesî beşdarê xebata Grûbe bîyê. Grûbe ra şeş kesan zî cuya xo vînî kerda. Kesanê ke cuya xo vînî kerda wina yê: Memo Darêz (Bongilan), Wisif Kaymak (Pîran), Ahmedê Dirihî (Çewlîg), Polat Aydin (Çêrmûge), Mahmûd Nêşite (Licê), Munzur Çem (Dêrsim).
Nika endamê Grûba Xebate ya Vateyî nê 24 kesî yê:
- Nadîre G. Aldatmaz (Dêrsim)
- Netîce Altun (Pasûr)
- Serdar Bedirxan (Pîran)
- Îbrahîm Bîngol (Gimgim)
- Nureddîn Celalî (Çewlîg)
- Haydar Diljen (Sêwregi)
- J. Îhsan Espar (Pîran)
- Neymetullah Gunduz (Gêl)
- Deniz Gunduz (Gimgim)
- Ronya Îlbasmiş (Sêwregi)
- Doxan Karasu (Çewlîg)
- Ehmed Kirkan (Sêwregi)
- Huseyîn Kulu (Dêrsim)
- Seyîdxan Kurij (Çewlîg)
- M. Malmîsanij (Pîran)
- Selîm Mûrat (Pali)
- Mehmet Olmez (Gêl)
- Wisif Pîrbab
- Ugur Sermîyan (Dêrsim)
- Şukrî Urgun (Hêni)
- Muzafer Xeylanij (Pali)
- Pinar Yildiz (Licê)
- Weysel Yıldızhan (Çêrmûge)
- Zulkuf Demirtaş (Pali)
Kovara Vateyî
Grûba Xebate ya Vateyî serra 1997î de kovara Vateyî weşanaye û na kovare heta nika 81 hûmarî ci vejîyayê. Nînan ra 20 hûmarê verênî Swêd de weşanîyayê. Serra 2003î de ke Weşanxaneyê Vateyî Stenbol de ame awankerdene, êdî kovare hetê nê weşanxaneyî ra ameye weşanayene. Kovara Vateyî kovara kirmanckîya yekta ya ke 1997î ra hetanî 2025î, 27 serrî bêvindertiş weşanê xo domnena û edebîyat û kulturê kirmanckî rê xizmet kena.
