Komeleya Dormeyî ya Munzurî vera projeyanê awbend û madenî nêrazîbîyayîş mojna û vat nê projeyî vîr, kultur û xozaya Dêrsimî cîn kenê.
Komeleya Dormeyî ya Munzurî bi şîarê “Ma destur medê Alîbogazi de awbend; Sekasur de, Geyiksuyu û Cevizlidere de maden bêro kerdene” eşkerayîye ameye dayene. Çalakîya ke verê Karanê Awe yê Dewlete yê Dêrsimî (DSÎ) de ameye kerdene xeylê partîyê sîyasîyî, rêxistinê komelê sîvîlî û komeleyê dormeyî û xeylê kesî tewrê ci bîyî. Çalakîye de pankartê “Destê xo medê xoza, awe û herra mi” ame akerdene.
Serekê Komeleya Dormeyî ya Yusuf Topçuyî bale ante poltîkayanê talankerdişî yê ke bi hewayêkê sîstematîkî yê vera Dêrsimî yenê kerdene ser û vat: “Bi awbendan wazenê vîr û mekananê ma yê bimbarekan awe de çin bikerê. Seba ke xozaya ma talan bikerî her qeyde paştdayîş dîyeno şîrketanê madenî.” Topçuyî veng da DSÎ ke wa nê projeyan caverdo.
Avûkat Bariş Yildirimî zî bale ante ser ke awebendî senî zirar danê ekosîstemî û vat eke no proje bêro caardene ekosîstemê Munzur, Alibogazi û Tagarî çîn benê.
Serekê Pêroyî yê DEDEFî Aliriza Bilirî zî ard ziwan ke nê projeyî do newera verê surgunkerdişê şarê Dêrsimî abikerî û vat ê do pîya bi şarê xo vera nê projeyanê neheqan do têkoşînê xo bidomnê.
