Qerar ame girewtiş ke komîsyono ke meclîs de awan bibo, bi însîyatîfê Serekê Meclîsî Numan Kurtulmuşî bêro awan kerdene. Ame musayene ke komîsyon tewr tay 44 endaman ra do pê bêro.
Ewro Serekê Meclîsî Numan Kurtulmuş û temsîlkarê partîyanê sîyasîyan çarçiweya “Prosesê Aştî û Komelê Demokratîkî” de seba awanbîyayîşê komîsyonê ke do problemê kurdan çareser biko, ameyî têhet. Kombîyayîşo ke teqrîben 2 saetî û nêm dewam kerd, heme serekê gruban ê wekîlan ê ke hetê partîyanê ke meclîs de yenê temsîl kerdene ra ameyî weçînayene, beşdarê ci bîyî.
ÎYÎ Partî ca nêgena
Goreyê malumatanê ke ameyî girewtiş, kombîyayîş de Kurtulmuşî teklîfê ke hetan ra verê coy ameybî pêşkêş kerdene û ser o hemfikir bîyî, pêşkêşê wekîlan kerdî. Na merhele de temsîlkarê partîyan zî teklîfanê xo yê neweyan pêşkêş kerdî. ÎYÎ Partî bi awayêko qetî îfade kerd ke na merhele de ê do endamêk nêdê komîsyonî. ÎYÎ Partî do mîyanê komîsyonê ke pawîyeno awan bibo de ca nêgêro.
Bi însîyatîfê Serekê Meclîsî
Pêvînayîş de xeylêk babetê ke eleqedarê komîsyonî yê zî ameyî destgirewtiş. Mîyanê babetê ke ameyî munaqeşekerdene de, yew zî o bi ke do senî yew komîsyon bêro awan kerdene. DEM Partî, CHP û Partîya Yenî Yolî verê coy pêşnîyazname yo ke pêşkêş kerdbî de teklîfê awanbîyayîşê komîsyonî bi qanûnan kerdbi. Pêvînayîşo ke ewro ame viraştene de, no teklîf reyna ame munaqeşekerdene. Qerar ame girewtiş ke cayê bi qanûnan awanbîyayîşî, komîsyon rasterast bi însîyatîfê serekê meclîsî bêro awan kerdene. Ame tesbît kerdene ke komîsyon do bi însîyatîfê Kurtulmuşî bêro awan kerdene.
Muhîmîya aştî û demokrasî
Babeta bîne ke pêvînayîş de ameye munaqeşekerdene zî nameyê komîsyonî bi. DEM Partî teklîf kerd ke nameyê komîsyonî de têgînê ‘Aştî’ û ‘Demokrasî’ ca bigêrê û pêşnîyaz kerd ke na het de yew formul bêro vînayene. Partîyanê muxalefetî zî paştî daye pêşnîyazê DEM Partî û israr kerd ke ganî têgînê ‘Demokrasî’ bikerê nameyê xo mîyan. Goreyê malumatanê ke ameyî wergirewtiş, temsîlkarê partîyanê bînan ê sîyasîyan ke AKP zî tede yo û serekê meclîsî, nêzdîbîyayîşêko negatîf nêkerdo seba nê teklîfî.
Babetêka bîne ya rojdemî ke kombîyayîş de ameye munaqeşekerdene zî o bi ke komîsyono ke do bêro awankerdene, do çend endaman ra pê bêro. Goreyê agahîyanê ke ameyî girewtiş, temsîlkarê partîyanê sîyasîyan ê ke gruba înan meclîs de çinî ya zî do ca bigêrê. 6 partîyê sîyasî estê ke gruba înan çinî ya û meclîs de ca gênê. Pawîyeno ke her partî ra yew temsîlkar beşdarê ci bibo. Hem zî vajîyeno ke komîsyon tewr tay 44 endaman ra do pêro bêro.
Kombîyayîşo yewin
Heto bîn ra, munaqeşe ser o ame kerdene ke do kombîyayîş de prensîb û bingeyê komîsyonî çi bê. Kombîyayîş de hemfikirîye ameye kerdene ke nê prensîb û bingeyî dima ke komîsyon ame awankerdene, kombîyayîşê yewinî de bêrê dîyar kerdene. Her wina nê kombîyayîşî de behsê çareserkerdişê persanê cîyayan ê komîsyonî ame kerdene. Goreyê malumatanê ke ameyî girewtiş, her partî ra do yew Wekîlê Serekê Grûbe bêro wezîfedarkerdene û yew koordînasyon bêro awankerdene. No koordînasyono ke awan bîyo, do pîya dîyar biko ke kam babet do rojdem de ca bigo.
Eleqedarê nê teklîfî qerar ame girewtiş ke qerarî bêrê nuştene. Kurtulmuş do hefteyo ke yeno, qeraranê ke ameyî girewtiş, bi nuştekî pêşkêşê partîyanê sîyasîyan biko. Kurtulmuş do dima nê xebate seba komîsyonî amedakarîye biko.
