Kombîyayîşê pancîn ê Komîsyonê Piştîdayîşê Neteweyî Wayûbirayî û Demokrasî, ewro verî Dayikanê Roja Şemeyî û Dayikanê Haştîye de qisey keno. Bado zî İHH, İHD, MAZLUMDER’î de qisey keno.
Çarçiwa prosesî yo ke seba çareyê meseleya kurdan dewam keno de, Kombîyayîşê 5. yê Komîsyonê Piştîdayîşê Neteweyî, Wayûbirayî û Demokrasî yo ke Meclîs de ameybî sazkerdene, ewro yeno serûberkerdene.
Kombîyayîş bi serekîya Serekê Meclîsî Numan Kurtulmuşî de yeno serûberkerdene.
Kombîyayîşê vizêrî de verî Wezîra Keye û Xizmetanê Komelkîyan Mahinur Özdemir Göktaşe pêşkêşî kerdbî.
Dima ra temsîlkarê Komela Xazîyanê Melûlan ê Şerî, Komela Vîya û Sêwîyan ê Şehîdan, Weqfê Keyeyanê Xazî û Şehîdan ê Tirkîya û Weqfê Piştîdayîşê Nêzdîyanê Şehîdan û Xazîyan ê Tirkîya û Keyeyê ke Amed de nobete gênê amebî goştaritene.
Dayikê Roja Şemeyî û Dayikê Haştîye bêrê goştaritene
Kombîyayîşê ewro zî yeno serûberkerdene. Ewro roniştişê veren ê kombîyayîşî de Dayikê Roja Şemeyî û Dayikê Haştîye yenê gotşaritene.
Roniştişê dîyin ê ewroyî de Weqfê Heq û Azadîyanê Merdiman û Hetkarîya Merdimî (İHH), Komela Heqanê Merdiman (İHD), Komela Heqanê Merdiman û Seba Mazluman Piştîdayîşî (MAZLUMDER) û Weqfê Heqanê Merdiman ê Tahir Elçî do bêrê goştaritene.
Komîsyonî kombîyayîşo hirêyin 12 Tebaxe de serûber kerdîbî. Nê kombîyayîşî de partîyanê sîyasîyan nameyê kes û sazgehanê ke wazenê ke komîsyon de bêrê goşdaritene pêşkêş kerdîbî.
Lîsteya Partîya Têduştî û Demokrasîya Şaran (DEM Partî) ya ke pêşkêş kerdîbî de hetê organîzasyonanê heqanê merdiman, huqûq û komelanê sivîlan de organîzasyonê cinîyan, komelê heqanê gedeyan û kesê ke warê zîwan-kulturî de pispor ê zî ca girewtiybî.
