Hemserekê Pêroyî yê DBP’yî Keskîn Bayindirî vera qerarê heqê hêvîye yê Komîteya Wezîran nêrazîbîyayîş mojna û vat: ”Komîte berpirsîyarîye ra remeno. Têkoşîno ke vera tecrîdî yeno dayene, têkoşînê têhetameyîşê edaletî yê welatî yo.”
Qerarê heqê hêvîye yê Mehkemeya Heqanê Merdiman a Ewropa 12 serrî yo nîno caardene û Komîteya Wezîran a Konseya Ewropa heta hezîrana 2026 reyna wext da Tirkîya. Seba ke komîte semedê caardişî nêşi Tirkîya ser û newera wext da xeylê hetan ra vengê nêrazîbîyayîşî bi berz.
Hemserekê Pêroyî yê DBP’yî Keskîn Bayindirî no qerar sey tewirê berpirsîyarîye ra remayîşî erjna.
Bayindirî ard ziwan ke Rayberê Şarê Kurdî Abdullah Ocalan têna tepişteyêk nîyo, eynî wextî de mîmarê prosesê aştîye yo û nê vatî: ”Birêz Ocalan semedê şarê kurdî têna fîgûrêko sîyasî nîyo; eynî wextî de sey aktorê prosesanê çareserî û aştîye rolo tarîxî girewt xo ser. Rixmê tecrîdê giranî semedê ameyoxê hemparî yê şaranê Tirkîya tewirê dîyalog û çareserî fîna werte. La nê prosesî de rejîmê taybetî yê Îmraliyî têna binpaykerdişê heqan nêkena, eynî wextî bi hewayêkê sîstematîkî îradeyê şaran cum kena. Caardişê Îmraliyî goreyê huqûqî û pêkerdişanê mîyanneteweyîyî nîyê. Tîya de têna kesêk nîno tecrîdkerdene; zemînêkê çareserîye, hêvîyêka ameyoxê demokratîkî û perspektîfê aştîye yenê tecrîdkerdene.
Seba ke prosesê çareserîye ser bikewo ganî Birêz Abdullah Ocalan şertanê azadan û biasayîşî de biciwîyo û tewrê falîyetanê sîyasîyan bibo. Çunke perpektîfê çareserîye ke ey aver berdo, tecrubeyê bêhempayî teqdîm keno. Ganî nêro vîrakerdene ke Birêz Ocalan nê prosesî de têna hetêk nîyo; mîmarê çareserî, ronayoxê dîyalogî, garantorê haştîye yo. Rixmo ke 25 serrî ra zafêr o binê tecrîdê giranî de yo, her firset de semedê sîyasetê demokratîkî veng dano. Eke vengê ey bêro kêmkerdene, eslê xo de vengê hêvîya aştîye birîyeno. Coka rejîmê Îmraliyî hetê teknîkî ra têna meseleya înfazî nîya; caardişê cumkerdişê sîyasî yo.
AKP semedê semedê îqtîdarê xo ameyoxê Tirkîya tarî keno. Aştîye têna bi edaletî bena. Çareserîye têna bi muxatabîya vera yewbînî bena. Azadîye têna bingeyê seyyewbînîye de bena. Tirkîya û Rojhelatê Mîyanênî de nê îlkeyan rê her wextî ra zafêr hewcedarî est a. Heta ke rolê Birêz Ocalanî nêro naskerdene no proses kêm maneno û her cigêrayîşê çareserî nîmcet maneno.
Rixmê qerarê Mehkemeya Heqanê Merdiman a Ewropa tecrîd dewam keno. No tesîrê bi hezaran tepişteyanê bînan keno. Bitaybetî zî tepişteyê nêweşî yê ke nêeşeknê têna miqatê xo bê. Na rewşe hende huqûqî, krîzê ehleqî zî nîşan dana. Nê semedî ra heqê hêvî têna serûberkerdişê înfazî nîyo; bingayê cuyeya birumete yo. Xespkerdişê nê heqî ra edaletî rê bawerî nêmenda. Dezgehê sey Konseya Ewropa, CPT û MHME bi serran o vera binpaykerdişan ê giranan gamanê pêtan nêerzenê têna bi hîşyarkerdiş û raporan qîm kenê. No tewir zî cesaret dano îqtîdarê Tirkîya.
Binê nê şertan de çîyo bewlîkerdox îradeyo hempar ê hêzanê komelkî, şaran û muxaletê demokraîtkî yo. Sere de şarê kurdî, têgêrayîşê cinîyan, têgêrayîşê ciwanan, pawitoxê heqanê merdiman û hêzê kede û demokrasî nê prosesî de rolê tarîxî kay kenê. Têkoşîno ke vera tecrîdî yeno dayene, têkoşînê têhetameyîşê edaletî yê welatî yo. Vera nê caardişanê bêhuqûqîyan bêvengmendiş hemkarîya sûcî ya. No têkoşîn têna têkoşînê tepişteyan nîyo, têkoşînê her kesî yo ke ameyoxê azad û edîlî wazeno.”
