Endamê Komîteya Amadekar a Newroze yê Amedî Ahmet Doganî dîyar kerd ke şarê kurdî Newroza Amed de mesajê zelalî dayê û vat: “Waştişê şarî zaf zelal ê. Ma Newroza 2026î de dî ke waştişê şarî azadîya Rayberê Şarê Kurdî û yewbîyayîşê şarê kurdan o.”
21ê Adare de Parka Newroze ya taxa Rezanî ya Amedî de bi sloganê “Newroza Azadî û Yewîya Demokratîke” Newroze ameye pîrozkerdene. Bi se hezaran kesî beşdarê pîrozkerdişê Newroze bîyî. Eynê wextî de desan şaristananê Vakurê Kurdîstanî û şaristananê Tirkîya de bi mîlyonan kesî beşdarê pîrozkerdişê Newroze bîyî.
Hemserekê Partîya Herêman a Demokratîke (DBP) yê Amedî Ahmet Dogan ke Endamê Komîteya Amadekar a Newroze yê Amedî bi, pîrozkerdişê Newroze ajansê ma rê erjna.
‘Şar amade yo û waştişî zaf zelal ê’
Endamê Komîteya Amadekar a Newroze yê Amedî Ahmet Doganî derheqê mesajan de ke Newroza Amedî de vejîyayê orte qisey kerd û wina vat: “Ma dî ke şar amade yo û waştişê şarî zaf zelal ê. A roje se ra 80 varan bi. Di serrî yo ke bala ma anto ke senî ke mesajê Rayberî yenê wendene varan vindeno. Seba ke Rayberê Şarê Kurdî paradîgmaya komelê xozayî ya zaf rengîne wazeno virazo, xoza zî ney rê bîye cewab.”
‘Şarî rixmê varanî zî heta peynî bi qerardarî vindert’
Ahmet Doganî wina vat: “Dîmeno ke ma Newroza 2026î de dîyî no bi; şar zaf qerardar bi, hende varan vara, va ame la qadî de to derzîne bieştêne, nêginayêne war ro. O şar heta peynî vera ê varanî de bi qerardarî vindert. Şarî tena mesaj nêda sîstemî eynê wextî de mesaj da rayberanê xo, partî û sazgehanê xo zî. Vat ke ‘Vindertişê xo waştişê xo zelal bikerê, raşt nêzdîyê ma bibê, raşt nêzdîyê Serekê ma bibê.’
‘Azadîya Rayberê Şarê Kurdî babeta munaqeşa nîya’
Ahmet Doganî bale ant problemanê teknîkî yê Newroze ser û vat: “Demo ke ma tede vîyarenê hem seba ma hem seba sîstemê Tirkîya demêko zernên o. Ereymendiş do vernîya zaf provokasyonan rayîr akero. Seba ke dora Tirkîya bîyo xelekêka adirî. Coka ganî babetê ke derheqê prosesî de ameyê qiseykerdene bilez gamî bêrê eştene. Azadî û statuyê Rayberê Şarê Kurdî seba ma babeta munaqeşa nîya. Ma pawenê ke bilez Rayberê Şarê Kurdî azad bibo. Ganî bilez nê gamî bêrê eştene çike wext nêmendo.”
‘Her ca de eynî vengdayîşî ameyê; azadî û yewbîyayîş’
Ahmet Doganî vat: “Vengdayîşî eynî vengdayîşî bîyê û zelal bîyê. Seke eynê çimeyî ra vejîyaybî, Kurdîstan, Tirkîya û dinya ra eynî veng vejîya. Azadîya Rayberê Şarê Kurdî û paradîgmaya ‘Aştî û Komelê Demokratîkî’ bilez bikewê merîyet. Yewbîyayîşê şaranê bindestan zî waranê Newroze de bi yew veng ame vatene. Rojev tena azadîya Rayberê Şarê Kurdî, yewbîyayîşê neteweyî yê şarê kurdî û yewbîyayîşê bindestan bi. Ganî ma seba şarê xo bibê cewab. Ganî rayedarê dewlete bilez gaman bierzê û ganî ma zî xebatanê xo bi hewayêko xurt rayra berê û înan bîyarê xeta haştîye. Ma reyna Newroza şarê kurdî û Newroza Rayberê Şarê Kurdî pîroz kenê. Serkewtiş û heme waştişê şarê kurdî di bêrê ca. Ma ney ra bawer ê.”
