Mazlum Ebdî dîyar kerd ke vengdayîşê Aştî û Komelê Demokratîkî yê Rayberê Şarê Kurd Abdullah Ocalan raşt bi raşt tesîrê ser aştî û aramîya Rojawanî keno û va ke armancê sereke yê konferansî temînatkerdişê heqanê şarê kurdî yo.
“Konferansê Yewrêzî û Yewnêzdîbîyayîşê Kurdî yê Kurdistanê Rojawanî”, şaristanê Qamişlo de domyeno. Rojawan, Bakûr, Kurdistanê Başûrî û zaf herêmanê Sûrîye ra zafêr 400 kesî beşdarê konferansî biyî.
Konferans de peynîya qiseyê komîteya hadrekarî, endamanê dîwanî ameyî weçînayîş ke Hemsereka Daîreyê Têkilîyanê Teberî yê Rayberîya Xoserîya Demokratîke ya Herêma Sûrîyeya Rojhilat û Bakûrî Îlham Ehmed, Hemsereka Partîya Yewîyeya Demokratîke (PYD) Perwîn Yusif û Serekê Encumanê Niştamanî ya Kurdî Sûrîye Mihemed Îsmaîl pê ame.
Îlham Ehmed xêrameyîşê beşdaran kerd û dîyar kerd ke şarê kurd bi pêroyî benda nê qewimyayîşê tarîxî bî û wina va: “Rojawan seba nîqaşkerdişê heqê xo resayî, merheleyêkî. Ma resayê merheleya temînatkerdişê heqanê kurdan. Ma nêzdîbîyayîşê kurdî û hêzanê kurdî yê sey Rayber Abdullah Ocalan, Birêz Mesud Barzanî û Bafil Talabanî yê ke hetkarî dayê hêzanê kurd û şarê Kurdistanê Rojawanî dîyenê. Ma vengê komelê xo goşdarenî ke vanê bibê yew. Ma ewta de kom bîyê ke biresê wesîqeya temînatkerdişê heqanê kurdan.”
Sûrîyeyêka demokratîk
Mazlum Ebdî spasîya Hemserekîya KCK’î, Mesud Barzanî kerd ke hetkarî dayê konferansî û wina va: “No konferans netîceyê kedêka gird, kombîyayîş û dayişûgirewtişê girde yê hêzanê Kurdistanî ame viraştiş. Yewîya kurdan seba pêroyîya Sûrîye, hêzêko hetkarî yo. Lazimîya Sûrîye bi destûrêko newe esto ke pêroyîya şarê Sûrîye vera biko û Sûrîyeyêka demokratîke ya nêmerkezî awan biko.”
Şaran pîya cuyenî
Mazlum Ebdî dewamê qiseyê xo de bal ant ser na yewe 12 serran a ke Rojawan de pêroyîya pêrabeste, kurd, ereb, suryan û ermenî pîya cuyenî û wina domna: “Bernameyê sîyasî nîqaş bikerî û do derheqê awankerdişê heyetêkê hembeşî yê ke do seba temînatkerdişê heqanê kurdan bi hukmatê Şamî ra nîqaş biko û qerarêkî bidê. Ma heme bi hêzê xo hetkarî danî vengdayîşê Aştî û Komelê Demokratîkî û no vengdayîş tesîrê aramîya Rojawanî keno. Konferansê Yewrêzîya Kurdî do zemînê awankerdişê viraştişê kongreyêka neteweyî ya kurdistanî awan biko.”
