WAN- Cinîyê ke ma înan ra sebebê krîzê ekonomî persa, vat: “Semedê krîzê ekonomî kar çin o, merdim nêeşkeno kar peyda bikero. Bi taybetî Wan de îmkanê karî çin ê. Ez nêzana ke do kam ma bivîno û bieşnawo, ma wazenê ke no sîstem bêro vurnayîş.”
Bazarê taxe ke Taxa Xaçortî ya qezaya Rêya Armûşê ya Wanî ameyo akerdiş, vayîya sebzeyî heta 100 TL vejêna, vayîya fêkî mabêne 90-100 TL de vuryena. Pêwa derûdorê herême sînorê zî semedê jî kontrolê zêdeyî, welatijî nêeşkenê malzeme teber ra bigîrê. Na rewşe hem vayîya bazarî zêde kena û hem zî bena sebebê kêmbîyayîşê rotişî.
Cinîyê ke ameyî bazarê Taxa Xaçortî dîyar kerdî ke semedê zêdebîyayîşê vayî ê nêeşkenê debara xo bikerê.
‘Ma wazenê ekonomî bêro sererastkerdiş’
Naciye Işik reaksîyon vera vayî mojna û vat: “Ma her tim bi zêdebîyayîşê vayîyan aya benê. Ma bi zehmetî debara xo kenê. Ez û mêrdeyê xo tena keye de yê, la ma nêeşkenê debara xo bikerê. Vayîya bazarî xeylêk zêde ya. Kîloyêk sîr bi 300 TL yo. Ma nêeşkenê debara xo bikerê, ma demêk zehmetî de yê û ma wazenê ke ekonomî bêro sererastkerdiş.”
‘Destpêk û peynîya bazarî de ferqê vayî est o’
Zeynep Eryilmaz zî wina vat: “Her roje vayîya her çî zêde bena. Merdimî nêeşkenê semedê keyeyê xo çîyêk bigîrê. Ma nêeşkenê berardişê kirtasîye bigîrê. Ma 10 hezar TL meaş gênê. Vayîya bazarî qaşo kêmî ya la wexto ke ma şinê eynî çî yo. Sere û peynîya bazarî de ferqê vayî est a. Marolêk 70 TL yo. Sebebê krîzî kesê ke Tirkîya îdare kenê yê. Ma bazar de çîyê ercanan gêrenê û hewl danê înan bigîrê.”
‘Ma wazenê sîstem bivuryo’
Emîne Aslan zî dîyar kerd ke wazenê sîstem bivuryo û vat: “Ma 900 TL anê bazar û bi çar-pênc parçe çî agêrenê keye. Ercê vatişî yo ke ma zanê berpirsîyar kam o. Nanêke bîya 9 TL, merdim do senî biwero û bişimino? Însanî nêeşkenê kar bivînê. Bi taybetî Wan de îmkanê karî çin ê. Ma wazenê ke no sîstem bivuryo.”
‘Vayîya sebzeyê teze û yê xirabîyaye yew ê’
Sarya Aksin zî acizîyê xo vayî ser o qal kerd û vat: “Ma yenê bazar û çi ercan bo ma gênê. Vayîya her çî xeylêk zêde ya. Wendekarê ma est ê û ma nêeşkenê lazimîyê înan ca bîyarê. Kar çin o la her roje vayîya her çî zêde bena. Ma nêzanê do se bikerê. Sebzeyê teze û rijyaye eynî vayî de yê. Semedê çareserkerdişê krîzî ganî şar bêro têhet û bibê yew.”
‘Yê wayîrê ke pere gênê û yê bêpere zî vêşan ê’
Vahide Arikan zî wina qisey kerfd: “Ma nêeşkenê dikandaran ra zî bazar ra zî çîyêk bigîrê. Esnafî zî rewşêke zehmetî de yê û nêeşkenê çîyêk bigîrê. Kîra, ceyran û gaz her tim zêde benê. Debara cuye nika xeylêk zehmet bîya. Dewlemendî ser kewenê la feqîrî bêçare manenê. Yê ke pereyê înan çin ê vêşan manenê. Her kes rewşêke xidar de yo, ma wazenê ekonomî bêro sererastkerdiş.”
Çime: JINNEWS
