KURDÎGEHî deklarasyonê 21ê Sibate Roja Ziwanê Dayike ya Dinya eşkera kerd û waşt ke kurdkî destûrê bingeyî de ca bigîro û bi qanûnan bêro garantîkerdene.
Komela Averşîyayîşê Kultur û Ziwanê Kurdkî (KURDÎGEH) awanîya xo ya qezaya Rayîrê Ermuşî ya Wanî de deklarasyonê 21ê Sibate eşkera kerd. Partîyê sîyasîyî, hemşaredarî, temsîlkarê sazgehanê sîvîlan û zaf ziwanhesî beşdarê eşkerayîye bîyî.
Hemsereka KURDÎGEHî Arîfe Aslan deklarasyon wend û vat ke têkoşîn û kampanyaya wendekaranê Unîversîte yê Dakka, şikitişê sîstemê yewperestî û yewziwanîye de bî bingeyê na roje ke seba pawitişê kultur û ziwananê ke hemverê talûkeyê vindîbîyayîşî de yê, ameye qebulkerdene. Aslanî vat: “Şarê kurdî se serran ra zafêr o ke hemverê sîstemê yewperestî ke vera kultur, ziwan û nasnameyê kurdan polîtîkayanê înkar û çînkerdişî mojneno, xover dano û venga heme şarê Kurdîstanî, Tirkîya û dinya da ke têkoşînê xo yê seba statu û heqanê xo yê ziwanî xurtêr bikerê.”
Aslanî çalakîyê ke do bikerê, wina rêz kerdî: panel, rayîrşîyayîş, eşkerayîye, tîyatroyê seba cinî û domanan, şewê dengbêjan, bernameyê îmzakerdişê kitaban, standê waştişê perwerdeyê kurdkî, akerdişê Parka Gulîstanê Ziwanan, konserê zafziwanî, semînerê hîşyarîya ziwanî seba keyeyan û bi serkêşîya Meclîsê Kirmanckî seba vernîgirewtişê vindîbîyayîşê kirmanckî UNESCOyî û Wezîrê Perwerdeyî rê şawitişê mektûban.
Aslanî peynîya qiseyanê xo de vat: “Heta ke ziwanê kurdkî destûrê bingeyî de nêro qebulkerdene, bi qanûnan nêro garantîkerdene û verdibistane ra heta unîversîte nêbo ziwanê perwerdeyî, ma do têkoşînê pawitiş, averşîyayîş û garantîkerdişê kultur, ziwan û nasnameyê kurdkî bi qerardarîye dewam bikerê. 21ê Sibate Roja Ziwanê Dayike ya Dinya şarê ma yê kurdî û heme şarê bindestan rê pîroz bo.”
