Şarê Kobanê çalakîyê ke sînor de verba hêrişanê Vakur û Rojhelatê Sûrîye Vakurê Kurdistanî de benê silam kerdî û mesajê “Kurdîstan yew o” da
Verba hêrişanê Tirkîya yê Vakur û Rojhelatê Sûrîye nobetê ke sînorê Kobanê û Qamişloyî de dest pêkerdê, hetê şarê Kobanê ra sînor de ameyî silamkerdene. Beyanatê de ke sînorê Kobanê-Pirsûsî de ame kerdene, xeylî sîyasetmedar û şarê Kobanê beşdar bîyî. Beyanatê de pankartêko ser o “Rojawan û Vakur yew şar û yew doz o. Ma têkoşînê şarê xo yê Vakurê Kurdistanî silam kenê” nusîyayo ameyê akerdene û ala Îdareyê Xoserî yê Demokratîk û Hêzanê Sûrîye yê Demokratîkan (HSD) ameyî tepiştiş.
Hemserekê Meclîsê Rayberdişî yê Kantonê Firatî Ferhan Hec Îsayî beyanatê de qisey kerd û va: “Xoverdayîşê Kobanê heme dinya de veng da. Mezelê Şehîdanê Kobanê de nasnameyê heme şaran est ê. Mezelê Şehîdanê Kobanê nîşanê yewîya Kurdan o. Xoverdayîşê Kobanê de Kurdê her çar hetê Kurdistanî têkoşîn da. Kurdîstan çar lete nîyo, yew o. Xoverdayîşo ke 2013î de vejîya meydan ruhê şarê Kurdistanî bî. Nê ruhî sînorî bêmana kerdî. Şarê ma yo ke Vakur de yo no xoverdayîşî de ca girewt. Xoverdayîşê Kobanê rê bîyî nefes.”
Ferhan Hec Îsayî têkoşînê şarê Vakurê Kurdistanî yo ke vera hêrişanê Vakur û Rojhelatê Sûrîye yo silam kerd û wina dewam kerd: “Fedakarîya şarê ma yê Vakurî, azadîya Kobanê garantî keno. Şarê ma yê Vakurî verê zî zaf gedeyê xo seba Kobanê feda kerdê. Reyna ma şarê xo yê Vakurî ke na herre bi gonîya xo pawita, bi hurmet anê xo vîrî. Şarê Kurdî yew o. Rojê serkewtiş nêzdî yê.”
Beyanat bi slogananê “Bijî berxwedana gelê Bakur”, “Bijî berxwedana Rojava” qedîya.
