Platformê Pawitiş û Piştîdayîşê Şaristanî yê Amedî lîste û adresa komkerdişê hetkarîya seba Kobanî pare kerdê û waşt heme şar paştî bido hetkarî.
Platformê Pawitiş û Piştîdayîşê Şaristanî yê Amedî ke seba Kobanî dest bi hetkarîya merdimî kerde, eşkerayî daye. Eşkerayî Merkezê Fuarî yê Mîyanneteweyî yê Mezopotamya de ameye dayene û temsîlkarê platformî beşdar bîyê. Metnê eşkerayî Sereka Komela Cinîyan a Rosa Zeynep Sîpçîk wend.
Eşkerayîya seba kampanyaya hetkarîya merdimî wina ya:
Vera krîzê merdimî ke hewteyanê peyênan de Kobanî de gird beno, dimayê vengdayîşê ma yê vizêrî yê seba raya pêroyî, sey Platformê Pawitiş û Piştîdayîşê Şaristanî yê Amedî ma kampanyaya xo ya hetkarîya merdimî ya lezgîne daye destpêkerdene. Riyê koçberîya vêşe û şertanê giran ê cuye ra herême de resayîşê malzemeyanê lazimtîyanê bingeyîn de problemê cîdî yenê vînayene.
Na çarçewa de goreyê lîsteya lazimtîyan a ke qade ra ma rê ameya, komkerdişê nê malzemeyan dest pêkerdo:
Lîsteya lazimtîyanê lezgîn; awa şimitişî, malzemeyê werdî, berhemê hîjyenî yên cinîyan, şit, werd (mama) û potikê (bez) gedeyan, betanî, cil û bergê zimistanî (mont, qazax, bot).
Berhemê destê dîyinî nêyenê qebulkerdene.
Merkezê komkerdişê hetkarî; Qadê Fuarî (rayîrê Xarpêtî ser o) – Têkilî: 0 536 031 24 21, Otoparkê Stadî Mîllet Bahçesî (Stadyuma kehene) – Têkilî: 0 536 031 24 61
Yeno plankerdene ke heme hetkarîyê merdimî yê ke ameyê komkerdene, Berê Sînor ê Murşîtpinarî ra vîyarenê Kobanî. Sewbîna ma raya pêroyî reyde pare kenê ke; 30 tirê ke do bi malzemeyê hetkarî barkerdene, nika amade yê û bi girewtişê destûranê lazim do sewqîyat bilez dest pêbikero.
Ma vengddanê heme şarê xo û hetanê haydar ke piştgirî bidê na kampanyaya piştgirîya merdimî.”
Eşkerayî ra pey Hemşaredarê Amedî Dogan Hatunî zî qisey kerd û vengdayîşo lezgîn a hetkarîya merdimî şarê Amedî rê kerd.
