Hemsereka MED-DER’î Şukran Yakut îlankerdişê Meclîsê Kirmanckî ser o va ke ê xebatanê xo bi ruhê vengdayîşê Aştî û Komelê Demokratîkî kenê û wina va: “Ma kirmanc, kird, zaza, dimilî yanî zerrîdarê lehçeya Kirmanckî, Meclîsê Kirmanckî îlan kenê.”
Tirkîya de 18 ziwanî çi heyfo ke ya helîyayî û ya zî vînî bîyê. Lehçeyê ziwanê kurdkî zî polîtîkayê asîmîlasyon û qedexekerdişî ser o hîna binê telûke de yê. Kirmanckî bi dîyalektîya xo zaf zengîn a, kirmanckî xususî warê perwerdeyî û sîyasetî de bêro şuxulnayîş. No çarçiwede zî do roja 04.05.2025 (Yewşeme) saet: 14.00 de Salonê Konferansî yê Baroya Amedî de bêro kerdiş.
Îlankerdişê Meclîsê Kirmanckî ser o Hemsereka MED-DER’î Şukran Yakut babete ser o ajansê ma rê qise kerd.
Hemsereka MED-DER’î Şukrat Yakut va ke vengdayîşê Rayberê Şarê Kurdî Abdullah Ocalanî yê ‘Aştî û Komelê Demokratîkî’ yê 27ê Sibate de ame kerdiş; no vengdayîş seba şarê Rojhilatê Mîyanênî û her wina seba heme kurdan rê zaf muhîm û avzel o û wina va: “No vengdayîş cuyayêka newe ke heme renganê mîyanê xo de hewîneno û pêşkêşî şaranê Rojhilatê Mîyanênî û bi xususî kurdan rê keno. Eynî demî seserra 21. de Tirkîya û Rojhilatê Mîyanênî ra beranê awankerdişê komelê demokratîkî akeno.”
Hişmendî û polîtîkayê ziwanî
Şukran Yakut dîyar kerd ke ê sey zerrîdarê lehçeya kirmanckî, nê vengdayîşî ra hetkarî danî û bi na wesîle dîyar kenê ke ê do hewcedarîyanê mîsyon û verpirsîyarî ke nê vengdayîşî de, înan rê ameyo kerdiş, do ca bîyarî û wina domna: “Goreyê nê mîsyonî, seba ke ma xebatanê xo bi rûhê vengdayîşê Aştî û Komelê Demokratîkî bidomnî û rêxistinbîyayîşê xo xurt bikerî. Ma kirmanc, kird, zaza, dimilî yanî zerrîdarê lehçeya Kirmanckî, meclîsê xo yê bi nameyê Meclîsê Kirmanckî îlan kenê. Bi nê Îlankerdişê Meclîsê Kirmanckî ma do xebatanê xususî ser hişmendî û averberdişê kirmanckî ser o polîtîkayan bivirazî. Mi na munasebetê ez heme ziwanhes, ziwanzan, zerrîyadarê ziwanî û bi xususî heskerdoxê kirmanckî na roja tarîxî ra dawet kena.”
