Beşdaranê nobeta Pirsûsî ra Endamê Meclîsê Ciwanan ê DEM Partî Huseyîn Aslan û Hemsereka DBP’î ya qezaya Şahînbeyî ya Dîlokî Hatîce Sezgîn seba pawitişê destkewteyanê Rojawanî û yewîye veng da
Vera hêrişanê Dewleta Tirke û çeteyanê ci yê SMO’yî yê serê Rojawanî sînorê Kobanê yê Pirsûsî de roja çarine de çalakîya nobete dewam kena.
Beşdaranê nobeta Pirsûsî ra Endamê Meclîsê Ciwanan ê DEM Partî Huseyîn Aslanî pare kerd ke Rojawan û Kobanê bi xoverdayîşê vera hêrişanê DAIŞ’î bîyê merkezê girîngî. Aslanî vat: ”Senî ke ma Kobanê azad kerde, bi heman ruhî ma do Rojawanî vera SMO’yî şer bikerê û Kobanê azad bikerê. Ez venga ciwananê Kurdan, şorişgêranê enternasyonalîstan dana ke vera şerî aştîye û azadîye bîyarê ca.”
Hemsereka DBP’î ya qezaya Şahînbeyî ya Dîlokî Hatîce Sezgîn vat: ”Ma bi zerrîya xo hetê Rojawanî de yê. Ez tîya ra venga şaran dana ke bêrê ma pîya aştîye, wayûbiratîye, têdûştîye û cuye bipawê. Tirkîya hetêkî rê vana ‘çareserîye’, hetê bînî ra seba Rojawanî vana ‘Ez do biqedîna.’ Ganî destkewteyê Rojawanî bipawîyê. Rojawan seba dinya modelêk o.”
