Bahar Peker, aktivîsta TJA’yî, ajansê ma rê derheqê prosesê aştî de ke Abdullah Ocalanî dayo destpêkerdene qisey kerd û derheqê 8ê Adare Roja Cinîyan a Dinya de fikrê xo pêşkêşê ajansê ma kerdî.
Peker dîyar kerd ke cinî wazenê 8ê Adare mîyanê aramî û aştî de pîroz bikerê: “Ma cinî wazenê ke aştî û aramî mîyan de ver bi 8ê adare şêrê. Ma naye wazenê. Ma seba naye plansazîya xo virazenê.”
Hesasîya prosesê aştî ser o qiseyê Peker wina bîyê: “Gama ke ma nê prosesî ra ewnîyenê, ma fehm kenê ke zaf muhîm o. Hetê polîtîka ra zaf çî ameyî bedilnayene. No semed ra ma cinîyê TJA’yî zî sey cinîyanê Kurdistanî ma piştî danê nê prosesî. Çi destê ma ra bêro ma kenê, xora heta nika cinîyan tim piştî dayo aştî.”
Aktivîsta TJA’yî ke bale ant têkoşînê cinîyan yê vera kiştiş û îstîsmarê gede û cinîyan wina vat: “Destê ma ra çi bêro ma kenê. Kêmanîyê ma zî est ê la ma vanê ke ma pê xebatêka xurte kêmanîyanê xo biqedênê. Amancê ma no yo.”
Peker va ke ganî derheqê prosesî de şar bêro agahdarkerdene û wina dewam kerd: “Eslê xo de no proses zaf muhîm o coka ganî ma zî têkilîya xo cinîyan reyde bikê gird, ganî ma keye bi keye qade bi qade bigêrê û behsê nê prosesî bikê û şarê rê îzah bikê.” Aye îlawe kerd ke muhîmîya îzahkerdişê prosesî biney destkewtîyanê têkoşînê cinîyan reyde eleqedar o û dewam kerd: “Ma bi saya Rayberê Şarê Kurd zaf çî qezenç kerdî. Verê cinî kole û bindest bî. Nika cinî ameyê astêka berze tena vakur û başûr de ney heme dinya de vengê ma reseno her ca.”
Peker qiseyê xo wina qedênayî: “Coka bi şew û roj zî bibo ma ganî ma bixebitîyê. Beno ke tayê kesî no proses fehm nêkerdo. Hewce keno ke ma şêrê her ca de îzah bikê.”
Aktivîsta TJA’yî îlawe kerd ke 8ê Adare do fealîyetê binê sloganê aştî û aramî de bibê û aye dîyar kerd ke cinîyanê TJA’yî di hefte yo ke her ca û her qade de fealîyetê xo kerdê.
