Welatijê Amedî reaksîyonê qetilkerdişê rojnameger Nazim Daştan û Cîhan Bîlgîn dayê û vatê: “Ê seba ke heqîqet nuştinê, no ser ma deyndarê înan ê.”
Demê Dewleta Tirke û çeteyê Artêşa Neteweyî ya Sûrîye (SMO) hêrişê Sûrîyeya Rojhilat û Bakûrî kerdinê, rojnameger Nazim Daştan û Cîhan Bîlgîn cayê qewimyayişî de hêriş teqîp kerdinê, 19’ê kanûne de bi Teyyareya Bê merdim a Çekdar (SÎHA) ameyê qetilkerdiş. Reaksîyonê verba qetilkerdişê rojnamegeran dewam kenê.
Şarê Amedî heqê qetilkerdişê rojnamegeran şîroveyê xo bar kerdê.
Welatijê bi nameyê Mehmet Ozçoban ard ziwan ke verba Sûrîyeya Rojhilat û Bakûrî de şerêko lêşin yeno şuxulnayiş, armancê nê hêrişan dagirkerdişî yê û no ser wa şarê Kurd bêveng nêmanê, ganî her kes destek bido Rojawanî ra.
Armanc qirkerdiş o
Welatijê bi nameyê Mehmet Hanîfî Kirar zî bal ant ke bi hêrişê ser Sûrîyeya Rojhilat û Bakûrî armanc qirkerdiş o û wina vat: “Ê ke polîtîkayê qirkerdişî kenê, nê merdimeyî yê, nê wijdan û nê zî exlaqê înan esto. Wa ma bi pîya verba na yewe bivinderê. Bêvengî teslîmbîyayiş o.”
Welatij Behçet Fîlîz veng Serekkomarê AKP’î Tayyîp Erdogan kerd û vîr ard ke rayedarê estbîyayişê Kurdan nas nêkerdê yew bi yew çin bîyê.
Vengê Yewîyeya Neteweyîye
Faruk Gunduz ard ziwan ke wa şarê Kurd verba na yewe, yewîyeya xo ya neteweyîye pê bîyaro.
Azad Dagsal zî wina vat: “Rojawan de rojnameger yenê qetilkerdiş. Şer do hetanî key dewam biko. Ma azadîye wazenê.”
Cengîz Yakat zî vat ke Heyet Tehrîr El-Şam (HTŞ) verê lîsteya terorî de bî û nika zî wazenê sey nerm nîşan bidê.
