Dewijê ke dewanê Pasûrî de ciwîyenê, dîyar kerd lke Koyê Dorşînî her tim şarê kurdî pawito û o seba înan xeylê muhîm o û vat: “Îşxalkeran çim fînayo herra ha.”
Xeylê herêmê qezaya Pasûrî ya Amedî bi destê Wezaretê Enerjî û Çimeyanê Xozayî ra yenê talankerdene. Bi desan şîrketî awe, zozan û koyanê Pasûrî talan kenê Her ca kerdo qadê madenî û her ca de şantîyeyî ameyê akerdene. Darê Koyê Dorşînî û Zozanê Hesendînî yenê birnayene. Raporê ÇED’î yê şîrketan çin o ke Zozananê Hesendînî de bixebitîyê. Goreyê nuqtaya Qanûnê Derûdorî, raporê ÇED’î çin bo, gêrayîşê madenî nêeşkeno bêro kerdene. La rixmê nê qanûnan zî Zozananê Hesendin û Koyê Dorşînî de talan dewam keno. Dewijî ke herême de ciwîyenê, derheqê nê talanî de reaksîyon û fikrê xo ma rê îfade kerdê.
‘Herra ma sermaye û îşxalkeran rê ameya pêşkêşkerdene’
Welatijê bi nameyê Mihemed Ay ke dewa Çixsî ya qezaya Pasûrî ra yo, îfade kerd ke ê seba ke xozaya xo bipawê, cehd kenê û vat: “Herra ma zerrn a, na herre ewro pêşkêşê sermayewerd û îşxalkeran ameya kerdene. Ma zî tîya de yê û xover danê. Tarîxî de zî ma zanê ke Koyê Dorşînî şarê kurdî pawito. Ganî ewro zî ma Koyê Dorşînî bipawê. Koyê Dorşînî de bi hezaran heywanî ciwîyenê. La herra ma rota îşxalkeran.”
‘Daristan û heywanî binê tehluke de yê’
Welatijê bi nameyê Yucel Çete ke dewa Şîrnasî ra yo, da zanayene ke ewro herêma înan de daristanî yenê talankerdene û vat: “Ma firsendê nêdanê nê şîrketan ke daristanê ma talan bikerê. Ma do ko û herra xo rê wayîr vejîyenê. Daristanî dewa Eskarî yenê talankerdene. Dewa Eskarî zî girêdayeyê Dorşînî ya. Şarê ucayî xapînayo. Şar bi daristan û heywanan debara xo keno. La ewro daristan û heywanî binê tehluke de yê.”
‘Ma do wayîrê tîyayî vejîyê’
Yucel Çeteyî dîyar kedrd ke Koyê Dorşînî namdar o, seba înan cayêko tarîxî yo û wina vat: “Pêroyî şarê kurdî Dorşînî şinasneno. Ma do wayîrê tîyayî vejîyê. Zozanê Hesendînî zî ewro yenê talankerdene. 12 dewî est ê. Şîrketêk est o ke wazeno şarê tîyayî koçber bikero. Debara nê dewan girêdayeyê Zozanê Hesendînî yo. Awa Hesendînî qîmê heme dewijan kena. Demo ke awa zozanî ziwa biba, dewijî do bêçare bimanê ke koçê şaristanan bikerê. Xora nê kesî reyêk koçber bîyê, ewro zî koç bikerê do şêrê ça?”
