Hesekê de Komxebata Mişewreyî ya Cinîyan ameye kerdene. Komxebate de semedê yewbîyîşê cinîyan û xurtkerdişê têkoşînî ame vengdayene.
Hesekê de serkêşîya Kongreya Starî de bi sloganê “Ma do bi yewîya cinîyan Sûrîyeyêka demokratîke înşa bikerê” Komxebeta Mişewreyî ya Cinîyan ameye kerdene. Pîya bi cinîyan ê Kurd, Ereb, Suryanî, Asûrî, Elewîyan Şam, Heleb û Suveyde ra 500 telegeyî tewrê komxebate bîyî.
Hemsereka Meclîsê Rayberdişî yê Îdareyê Xoserîya Demokratîke Evîne Siwêd ke komxebete de qisey kerd, ard ziwan ke şorişo ke şaran bi waştişê azadîye da destpêkerdene hetê hêzanê hegemonan ra ancîyeno yewna hetî û vat: “La şaranê Rojawanî vera nê sîyasetî têkoşîn kerd û şorişê xo heta ewro ard.”
Vervatoxa Yewîya Cinîyan ê Sûryanîyan a Sûrîye Corcêt Bersûm zî ard ziwan ke înan sey cinîyan ê Rojawanî vera zîhnîyetê camêrdê serdestî têkoşîno pîl da û vat: “Ma bedelê girdî dayî, xeylê qezencî fînayî dest. Ma do wayîrê mîrasê şehîdanê xo bivejê.”
Endamê Komîteya Hemserekîya Partîya Yewîya Demokratîke (PYD) Foza Yûsif zî vegn da heme cinîyan ke wa semedê Sûrîyeyêka demokratîke bibê yew.
Endama Fermandarîya Pêroyî ya YPJ’yî Rojhilate Efrîn zî veng da ke her cinîya ke zerrîya ci semedê azadîye erzena wa şer bikero û wayîrê welatê xo bivejîyo.
Temsîlkaranê grûbanê etnîk û bawerîyan zî qiseykerdişanê xo de vat ê semedê Sûrîyeya demokratîke hazirê ke hetanê neteweyî, Ereb û mîyanneteweyîyî reyde bixebitê.
