Grûbêka ke tede nuştox, mamosta û cigêrayoxê sivîlî est ê, seba pawitişê Rojawanî û vilakerdişê mesajanê aştîye Pirsûs de ameyê têhet. Çalakgeran seba ke heme şarê Rojhelatê Mîyanênî bi aştî û azadî biciwîyê, vengê xo berz kerd.
Nuştox Hecî Ozkal qiseykerdişê xo de bale ant ke Kurdan rê firsendêko tarîxî vejîyayo meydan. Ozkalî va: “No firsendêko serranê di hezaran ra pey kewto destanê Kurdan, ganî bêro fehmkerdene. Êdî na erdnîgarîye de şaranê bînan rê çi leyiq ameyo vînayene ganî Kurdî seba xo zî leyiq bivînê û xo bikerê wayîrê statuyêk.”
Hemsereka GOÇ-DER’î Medya Alkan mesajê ke Abdullah Ocalanî ra ameyî, ci ser o vindert û va: “Na xebera ke ameye seba ma çîyêko pîl o. Heme şarê ma paweyê na xebere bîye. Serra 2014’i de şerêko pîl qewmîya. Nê şerî de ma way û birayê xo vîndî kerdê. Nê şer û qirkerdişî ganî biqedîyê.”
Serekê Egitim-SENî Şûbeyê 2. yê Amedî Serhat Kiliçî zî bale ant rewşa Rojhelatê Mîyanênî ser o û va: “Sûrîye de ganî wina nêbo. Uca de kamcîn netewe, şar û bawerî est ê ganî bişênê îdareyê Sûrîye de ca bigîrê.” Kiliçî qalê dîyalogî kerd û dewam kerd: “Hêvîya ma a ya ke çi problemê ma est ê, problemê şarê Rojhelatê Mîyanênî bi aştî bêrê çareserkerdiş nêke na seserre de zî no şer nêqedîyeno.”
Mamosta Xidir Aktaşî zî qiseykerdişê xo de qalê girdîya pawitişê Rojawanî kerd û wina va: “Pawitişê Rojawanî pawitişê heme şaranê Rojhelatê Mîyanênî yo. Na nobeta ke tîya de yena girewtene seba Rojawanî ya. Pawitişê Kobanê pawitişê Kurd û Kurdîstanî yo.” Aktaşî qalê pêvînayîşî zî kerd ke Abdullah Ocalanî reyde ameyo kerdene û va ke na gamêka zaf muhîm a û beno ke dîyalog dest pêbikero û problemî çareser bibê.
Çalakgeran mesajê xo yê peyênî de va: “Ma hetê Rojawanî de yê û ma do heme destkewteyanê Rojawanî bipawê. Hemverê nê çeteyan de ma do Kobanê û Rojawanî bipawê.”
