Endamê TEV-DEMî yê Helebî Leyla Xalid û Ferîde Osman hedefgirewtişê konvoya şarî ke verê xo dabî Awbendê Tişrînî şermezar kerdî û vatî: “Her çiqas dewleta tirkan bi teyareyanê xo hêrişî ma bikero zî do nêeşko peynîya xoverdayîşê ma bîyaro. Ma xoverdayîşî de biisrar ê.”
Bi hezaran roniştoxê Vakur û Rojhelatê Sûrîye paştdayîşê xo semedê hêzê Sûrîyeya Demokratîke mojnayî û hemverê rijnayîşê awbendê Tişrînî de îqaz kerdî. Wexto ke konvoya sivîlan ver bi awbendê Tişrînî de şîne, hetê teyareyê Tirkîya ra hedef ameyî girewtiş. Netîce de 5 sivîlî ameyî qetilkerdiş û 15 sivîlî zî birîndar bîyî.
Derheqê nê de endamê TEV-DEMî yê Helebî Leyla Xalid û Ferîde Osman ajansê JINNEWSî rê qisey kerdî.
‘Xoverdayîş pîlêr beno’
Leyla Xalid reaksîyonê xo hemverê hêrişan de ard ziwan û vat: “No demêk ke yo hêrişê dewleta tirkan ê îşxalkere awbendê Tişrînî ser o bi xidarî dewam kerd. La pêwa hende bi xidarî û hovîtî hêrişî yenê kerdiş la ercê vîrardişî yo ke hemverê nê hêrişan de xoverdayîşêk bêmabên yeno kerdiş û hem hetê şarî ra, hem zî şervananê QSD’î ra têkoşîn dewam keno. La çi heyf her ke xoverdayîşê şervanan pîlêr beno, hende hêrişê dewleta tirkan a îşxalkere giranêr beno.”
‘Ma xoverdayîş de biisrar ê’
Leyla Xalid wina qedêna: “No reya yewin nîyo ke konvoya şarî hedef yena girewtiş labelê vernîya 8 serrê peyîn ke şarê Helebî verê xo dayî bajarê Efrînî semedo ke şarê Efrînî rê bibê destek, ancî konvoya şarî hedef ameye girewtiş. Netîce de birîndar û şehîdî zî virazîyayî. Her çiqas dewleta tirkan bi teyaranê xo hêrişê ma bikero, do nêeşko peynîya xoverdayîşê ma bîyaro. Eksê ci ma hîna zêde xoverdayîş de biisrar benê.”
‘Ma na cografya ser o wayîrê heqî yê’
Ferîde Osman zî wina bale ant hêrişî ser: “Hêrişê dewleta tirkan serê awbendê Tişrînî hema zî dewam kenê. Welatijê sivîl yê Vakur û Rojhelata Sûrîye semedê paştdayîşê şervananê xo bikerê, verê xo dayî awbendê Tişrînî labelê dewleta tirkan a îşxalkere, bi hovîtî hêrişê konvoya şarî kerd û netîce de qirkerdişêk şarê ma ser o kerd û ma nê hêrişan bi şîdet şermezar kenê. Ma wayîrê heqî yê na cografyaye ser o.”
‘Ma xoverdayîşê şarî û şervanan silam kenê’
Peynîya qiseykerdişê xo de Ferîde Osman silam û heskerdişê xo xoverdayox û şarê ke nika awbendê Tişrînî de manenê rê şirawit û dîyar kerd ke do her paştdayîşê xoverdayoxan bikerê.
